‘Nao ăh pơgê hrôih, bre klo hơkăn ƀok K’Tồch tơ̆ kueng Kon Tách Đăng, thĭ trâ̆n Đinh Văn, apŭng Lâm Hà, dêh char Lâm Đồng iung đơ̆ng hrôih vă hơmet tơmam drăm ăn kon drŏnglo hơmol hơnăn K’Thái vih tơ̆ hnam hơkăn jê̆ pơkong.

Tôm tơmam drăm hlôi đei hơmet bot ‘lơ̆ng, mă lei ƀok ưh xơđơ̆ng lơ̆m đon, yă ƀok athei năm hơlen lăng pă ‘măng dơ̆ng. Ƀok K’Tồch ăn tơbăt:  “Khôi ‘nhăk pơtruh ŏng ưh đei pơgơ̆r đơ̆ng rŏng kơ pơxĭt đang. Đe xư gô tơroi adrol ăn găh hnam drăkăn băt. Mưh 2 unh hnam oei ataih dih băl noh gô tơroi ăn unh hnam găh drăkăn băt adrol lơ̆m 1 giĕng. Mưh oei tơjê̆ băl noh đe xư tơroi ăn găh hnam drăkăn lơ̆m 1, 2 năr đĕch”.

Lơ̆m tơ oei unh om kơ bơngai K’ho, ƀơ̆t mă bơngai hơdruh lăp kơ bơngai tơdăm mă yơ, xư gô kơdih pơkăl mĕ ƀă gơnơm bơngai pơm kơdranh năm trong apinh bơngai tơdăm vă iŏk pơm klo. Ƀơ̆t doh unh hnam tơdăm gô pơkăp mŭk hăm unh hnam drăkăn. Ăh mă bre hơdruh tơdăm drơ̆ng lăp păng unh hnam 2 păh drơ̆ng nơ̆r găh tơdrong pơkăp mŭk unh om noh tơdrong pơm kiơ̆ dôm pơkăl găh pơxĭt pơkong adoi găh unh hnam drăkăn pơvih đĭ.

Khôi ‘nhăk pơtrruh ŏng tơ̆ hnam hơkăn hơnơ̆ng đei pơgơ̆r đơ̆ng rŏng kơ pơxĭt minh giĕng. Pha hăm et pơxĭt đei pơgơ̆r ăh kơmăng, et ‘nhăk pơtrruh ŏng vih tơ̆ hnam drăkăn đei pơgơ̆r ăh pơgê hrôih. Ƀok K’Tồch ăn tơbăt:  Bơngai K’Ho ưh đei khôi chă rơih ‘năr ‘lơ̆ng, khei dơnưp mă adrô̆ pơkăp khei năr yơ ưh đei tơrĕk truh tơdrong pơm jang. Tơ oei unh om kơ bơngai K’Ho gơnơm lơ̆m bơngai pơm kơdranh trong noh khôi ‘nhăk pơtrruh ŏng vih oei găh hnam hơkăn duh kơyươ bơngai pơm kơdranh trong iŏk jang: “ ‘Năr ‘nhăk pơtruh ŏng găh unh hnam drŏnglo đei minh ƀar ‘nu năm hadoi atŭm hăm bơngai trong. Bơngai trong jing bơngai dơnơm kơ khôi ‘nhăk pơtruh ŏng vih oei găh hnam hơkăn. Năm hadoi noh đei mĕ ƀă, ‘nhŏng pơmai oh kơ ƀok ŏng”.

Ăh ‘năr ‘nhăk pơtruh ŏng noh găh drăkăn gô hơmŏ ‘nhĕm nhŭng, ier, xik tơm vă xơng unh hnam drŏnglo. ‘Năr mă noh, unh hnam drăkăn ƀuh 2 tŏ nhŭng. Kiơ̆ khôi, minh pôm nhŭng ‘măn jong et xa ăn unh hnam drŏnglo, oei minh pôm noh klăh axong tong anê̆, minh păh ‘măn jong ăn unh hnam drŏnglo, păh to noh ‘măn ăn unh hnam drŏnglo ‘nhăk vih, axong ăn dôm bơngai vang akŏm ‘nhăk pơtruh ŏng ‘năr noh. Tơdrong athei đei hăm unh hnam drăkăn noh tơm xik. Oei găh unh hnam drŏnglo gô đei minh ƀar tơmam drăm ăn kơ kon tơdăm po ‘nhăk ba ƀơ̆t vih oei găh hnam drăkăn: “ ‘Năr ‘nhăk pơtrruh ŏng noh găh unh hnam drŏnglo ‘nhăk ba hơkă, xăng tơgăk, hơkok, khăn buk, hơbăn ao păng hơmang. ‘Nâu jing dôm tơmam drăm mă găh unh hnam drŏnglo ‘nhăk pơtruh oei găh hnam drăkăn”.

Adrol kơ unh hnam găh drŏnglo tŏk tơ̆ hnam noh găh unh hnam drăkăn gô xoi tơbeh kiơ̆ khôi xơng unh hnam drŏnglo. Unh hnam drăkăn gô lơ̆k hla prit tơ̆ 'măng hnam, đang kơ noh kơxăi đak hăm bơngai tang măt ăn unh hnam drŏnglo vă hơpơi ăn kơ bre klo hơkăn 'nao pơkong gơh đei xơnêp xơnua, erih tơnăp păng jơnap. Ăh mơ̆t lơ̆m hnam drăkăn bơih noh, unh hnam găh drŏnglo gô đei unh hnam drăkăn xơng kiơ̆ Khôi chô̆ chơmei vă tơroh 2 hơdrung krung kơtum hăm dih băl. Ƀok K’Tồch tơroi: “Unh hnam găh drăkăn gô xơng unh hnam drŏnglo hăm khôi kơxăi đak. Unh hnam drăkăn dơ̆ng tơ̆ anăp 'măng hnam, kơxăi đak lơ̆m rim bơngai găh unh hnam drŏnglo. Đe xư kơxăi đak tơ̆ klĕng dăh mă ăh hơnglâu jơ̆ng, chô̆ chơmei ăh ako. Mă lei ưh kơxĭ lai yơ duh đei chơmei vă axong ăn unh hnam drŏnglo, mưh ưh đei noh găh hnam drăkăn gô pơkăp hăm jên vă pơtruh ăn unh hnam drŏnglo, mă lei ưh đei tơgĭt dôm yơ, adrô̆ pôk ăn dih băl vă pơtih pơtŏng đĕch”.

Ăh mơ̆t lơ̆m hnam, dang ƀok ŏng hlôi jing bơngai lơ̆m unh hnam găh drăkăn bơih. Kơplăh âu bơngai trong chĕp ti ƀok ŏng 'măn tơ̆ kơpal ti bơngai mai, pơjao tơtă kon drŏnglo ăn unh hnam găh drăkăn. ‘Meh vă unh hnam drăkăn lăng ƀok ŏng nhen kon mon lơ̆m hnam. Păng tơtă ƀok ŏng duh athei băt 'mêm kơ hơkăn, tơrĕk hăm mĕ ƀă hơkăn nhen lĕ mĕ ƀă po kơdih. Đơ̆ng rŏng kơ noh, 2 unh hnam gô drơ̆ng nơ̆r găh khei năr vă pơgơ̆r et pơkong: “KIơ̆ kơ tơdrong kĕ đei, mŭk drăm kơ unh hnam drăkăn mă đe xư pơgơ̆r pơkong đơ̆ng rŏng kơ keh đang khôi 'nhăk pơtruh ŏng. Oei mưh unh hnam tơnap tap noh unh hnam găh drăkăn ăh 'năr 'nhăk pơtruh ŏng noh đe ƀuh nhŭng vă jong xŏng xa hăm unh hnam drŏnglo păng axong ăn găh drŏnglo 'nhăk vih"

Đơ̆ng rŏng kơ pơm tôm khôi tih iĕ xơng unh hnamd rŏnglo 'nhăk pơtruh ŏng, unh hnam drăkăn gô ăn kơ unh hnam drŏnglo dôm tơmam plang pơkăp mŭk kiơ̆ pơkăp mưh kĕ đei. Oei mưh tam mă đei tôm tơmam pơkăp mŭk noh đe xư gô pơkă hăm unh hnam drŏnglo đơ̆ng rŏng kơnh pơtruh. Et 'nhăk pơtruh ŏng pơtôch hăm tơdrong et xa găh unh hnam drăkăn. Rim bơngai atŭm băl et xa vă thơ thâu pơxô̆ ăn kơ bre klo hơkăn 'nao.