Tơdrong pơgơ̆r au kơ yuơ Ƀăo Đại biểu Nhân dân chĕp pơgơ̆r, iung jang hơdoi pơgơ̆r ƀlep lơ̆m năr tơbăt 78 sơnăm Kĕch mang Khei Tơhngam păng Quốc khánh 2/9, lăng truh tơbăt 35 sơnăm năr pơjing Ƀăo Đại biểu Nhân dân (5/10).

Iung pơma pơgơ̆r blŭng a, Kơdră chĕp pơgơ̆r Ƀăo Đại biểu Nhân dân Phạm Thị Thanh Huyền pơma hơdăh, tơdrong iŏk đei jơnei kơ Kĕch mang Khei Tơhngam sơnăm 1945 păng tơdrong jing đei teh đak Việt Nam Dân chủ Cộng hòa, hrei au ‘noh Cộng hòa xã hội chủ nghĩa Việt Nam ‘noh mĭnh hơyak pran kơtang nuih mơng hloh, mĭnh hơyak gĭt kăl lơ̆m chăl sơnăm nuih mơng pran kơtang kơ hơdrĕch hơdrung; ba teh đak bơ̆n yak mơ̆t lơ̆m chăl hle-chăl pơm tơm kơdih hơdrĕch hơdrung tơklep hăm chủ nghĩa xã hội; chông ba Kon pơlei bơ̆n đơ̆ng bơngai đĭch đam hnam dông đe tŏk tơ iung bơ̆ jang chinh trĭ pơjing đei pơm tơm kơdih. Tơdrong pơgơ̆r joh hơri “Nắng Ba Đình” tơgop tơƀôh dơ̆ng jơ ‘năr gĭt kăl nuih mơng kơ dôm sơnăm tăm kơrach ưh kơ lai yơ hiơt; hơ-‘nguơ̆i, hôn bơnê kơ pơlei pơla teh đak, hôn bơnê kơ Đảng, Ƀok Hô, pôk pơ ư dôm ‘măng jơnei tih tên gĭt kăl đơ̆ng Kon pơlei bơ̆n, kơyuơ Việt Nam nuih mơng pran kơtang.