VOV4.Bahnar - Ƀlep lơ̆m năr kơ yuơ dôm bơngai jo jăn đơ̆ng ƀrơ̆m phao pơgang pơm ăn Việt Nam (10/8), tơ̆ dêh char Kon Tum, Pơdă “Ƀrơ̆m phao pơgang-Jơhngơ̆m đon ‘mêm mơnat păng tơdrong trŏ lăp” kơ yuơ Khŭl bơngai jo jăn đơ̆ng ƀrơ̆m phao pơgang dioxin pơm ăn Việt Nam, Binh chủng hoă hŏk păng Dơnŏ anĭh vei lăng kon pơlei dêh char Kon Tum iung jang hơdoi pơgơ̆r, hơnơ̆ng đei tơmoi lăng ba kơ jăp.

Kiơ̆ chĭh jô̆ đơ̆ng Hơnĭh Mong răk kơsơ̆p hla bơar dêh char Kon Tum đei ƀô̆h, lơ̆m 20 năr au ki hlôi đei 1.000 ‘nu bơngai năm tơmang lăng ‘măng Pơdă “Ƀrơ̆m phao pơgang-Jơhngơ̆m đon ‘mêm mơnat păng tơdrong trŏ lăp”. Lơ̆m rim tơmoi năm tơmang lăng đei lơ tơmoi tĕh đak đe păng dôm bơngai jo jăn, jĭ jăn đơ̆ng ƀrơ̆m phao pơgang dioxin kơ yuơ khŭl lĭnh Mi tơdrŭh tơ̆ tơring Pơbăh lơ̆m chăl sơnăm tơblăh vang tơgar iŏk tĕh đak Việt Nam đơ̆ng sơnăm 1961 trŭh sơnăm 1971.

Hơnơ̆ng plôih ‘măng sơng tơmoi tơmang lăng trŭh đĭ năr 25/8, ‘Măng pơdă “Ƀrơ̆m phao pơgang-Jơhngơ̆m đon ‘mêm mơnat păng tơdrong trŏ lăp” tơƀô̆h tơbăt vă jê̆ 400 hlak rup, hla bơar, tơmam drăm. ‘Moi kiơ̆ pơdă, kon pơlei păng tơmoi băt hơdăh hlŏh dơ̆ng găh tơdrong răm đơ̆ng ƀrơ̆m phao pơgang dioxin pơm ăn hăm cham char păng jơhngơ̆m jăn kon bơngai.

Tơblơ̆ nơ̆r: Amazưt