Năr lêh đei pơgơ̆r lơ tơdrong tôch git kăl nhen: pơgơ̆r joh hơri hơ ‘nguơ̆i kơ jơhngơ̆m đon tơgoăt tơgoăl, tơdrong jang hơdoi dih băl ‘lơ̆ng hơ iă, tơgoăt kơjăp iăp kơtang dih băl kơ 3 teh đak; pơgơ̆r pơlong hrŭk hơbĕn ao ‘lơ̆ng 12 hơdrĕch hơdrung ‘nhŏng ŏh erih sa, hŏk pơhrăm păng bơ̆ jang tơ̆ tơring sơlam teh đak; pơgơ̆r dơ̆ng tơdrong pơgơ̆r kơ̆m kang kơnang giĕng lơ̆m năr Têt joăt joe Bunpimay păng Chol Chnam Thmay.

Atŭm hăm tơroi tơbăt tơdrong ‘lơ̆ng hơ iă Têt joăt joe kơ 3 teh đak Việt Nam- Lào- Campuchia, tơ̆ Năr pơm lêh joh ayŏ dih băl Việt Nam- Lào- Campuchia hăm hơnăn “Tơdrong oei sa joh ayŏ kơdŏ soang Đông Dương”, rim boăl sinh viên păng tơmoi tơmang pơ hiơ̆ oei đei chă sŏng sa lơ ‘nhĕm ‘nhot joăt joe sơ̆ ki, vang chă pơma dơnuh dih băl dơ̆ng găh tơdrong oei sa, jŏh ayŏ kơ teh đak kơ dih đơ̆ng nŏh pơm ăn tơdrong tơgoăt tơgoăl dih băl kơjăp iăp kơtang, tơdrong tơgoăt tơgoăl dih băl kơ 3 teh đak.