Lơ̆m rim tơdrong jang tơbăt 93 sơnăm năr pơjing Đảng Cộng sản Việt Nam păng 110 sơnăm năr pơjing dêh char Kon Tum (9/2/1913- 9/2/2023), pơgê năr 6/2, tơ̆ apŭng Tu Mrông, dêh char Kon Tum pơgơ̆r pơm lêh Khinh khí cầu Sâm Ngọc Linh K5 “Păr tơmang lăng cham char”.

Tơ̆ pơm lêh, đei 30 tŏ khinh khí cầu păr tơ̆ rơvơ̆ng plĕnh groi teh Tu Mrông, hơnih đei ‘long pơgang gĭt kăl kơ teh đak Sâm Ngọc Linh. Vang năm pơm lêh, tơmoi păng kon pơlei tơring đei hao đĕch khinh khí cầu vă chă tơmang lăng bri kông ‘lơ̆ng liĕm. Mă kăl vang năm Pơm lêh au đei Trung tướng, Bơngai nuih mơng Ƀô̆ đô̆i kon pơlei Phạm Tuân, bơngai blŭng a kơ Việt Nam păng Châu Á păr tŏk tơ̆ plĕnh lơ̆m sơnăm 1980.