Tơ̆ Hop akŏm đei 6 nghệ nhân đei Kơdră Anih vei lăng kon pơlei dêh char Kon Tum asong Bằng khen; 23 nghệ nhân đei Kơdră Anih vei lăng hơdrĕch kon kông dêh char Kon Tum hơpăh hla ar Pơ ư yua kơ hlôi đei jơnei ‘lơ̆ng hloh lơ̆m tơdrong vei răk păng tơƀăk mong dôm kơjă kăp gĭt tơdrong jang joăt joe đơ̆ng sơ̆ kơ dôm hơdrĕch kon kông kơ tă anih. Dêh char Kon Tum dang ei đei 43 hơdrĕch hơdrŭng ‘nhŏng oh vang arih sa hơdai, lơ̆m noh đei 7 hơdrĕch kon kông kơ tă anih, ‘noh đei: Xơ Đăng, Gié-Triêng, Bahnar, Jrai, B’râu, Rơ Măm păng H’rê.

Yak hloh khei ‘năr, truh dang ei tơpôl dôm hơdrĕch kon kông kơ tă anih tơ̆ dêh char Kon Tum oei chĕp vei đei lơ tơdrong joh ayŏ joăt joe ‘lơ̆ng hơiă kơ hơdrĕch hơdrŭng kơdih, ƀôh hơdăh ‘noh jĭ dôm tơdrong jang joăt joe nhen: tanh brai vai khăn, hơ jơ̆m bơ̆n săng tơgăk, tanh reo, hơkăt, pơm dôm tơmam tôn reh kră sơ̆, bŏk thŏng an ‘long, chraih mul meo... pơm hơiă dơ̆ng tơdrong arih sa jơhngơ̆m đon păng tơmam drăm đơ̆ng kon pơlei.