Tơgop vei răk, tơ ƀăk mong dôm kơ jă kăp gĭt joh ayŏ joăt joe; yak truh kơ kuh chơt hơ iă tơ băt 40 sơnăm Năr thây kô pơtho Việt Nam păng tơbăt 110 sơnăm Năr pơ jing dêh char Kon Tum, Tơ̆ Rông Kon Klor, phường Thắng Lợi, Anih vei lăng pơtho pơhrăm pơlei tơm  Kon Tum, dêh char Kon Tum pơgơ̆r pơlong tôn chĭng chêng - Hơ soang păng pơ long hrŭk hơbăn ao kon kông ăn hŏk tro ‘măng mă VI sơnăm 2022.

Mĭnh kơ sô̆ um rup tơ̆ pơlong

Pơlong tôn chĭng chêng - Hơ soang păng pơlong hrŭk hơ băn ao kon kông ăn hŏk tro đei Anih vei lăng pơtho pơhrăm pơlei tơm Kon Tum pơ vei pơgơ̆r 2 sơnăm 1 ‘măng. Tơ̆ pơlong ‘măng mă VI sơnăm ‘nâu đei 16 khŭl hăm vă jê̆ 1.100 ‘nu hŏk tro vang akŏm.

Lơ̆m jơnăr pơgơ̆r pơlong đei hloh 300 ‘nu hŏk tro vang tôn chĭng chêng, 500 ‘nu hŏk tro hơ soang păng vă jê̆ 250  ‘nu hŏk tro pơlong hrŭk hơ băn ao kon kông. Đĭ đăng đe oh tơ tă hŏk tro jăl 1 păng jăl 2 hăm găh lơ ‘noh jĭ kon oh bơngai Ba Na.

Tơdrong pơvei pơgơ̆r pơlong tôn chĭng chêng - Hơ soang ăn kơ hŏk tro ‘noh jĭ tơdrong jang ‘lơ̆ng hơ iă đơ̆ng anih vei lăng pơtho pơhrăm pơlei tơm vă vei răk, tơ ƀăk mong dôm kơ jă kăp gĭt joh ayŏ joăt joe, vei rong jơ hngơ̆m đon đe oh roi ‘năr roi hơ iă păng tơ gŭm đe oh hŏk pơhrăm hơ gei, đei tơchĕng bơ̆ jang ‘lơ̆ng.