Tơdrong akŏm âu đei pơgơ̆r vă tơbang kơjă joh ayŏ juăt jue kăp gĭt kơ kon pơlei kon kông oei erih jang xa tơ̆ dêh char Kon Tum pơma adrô̆ păng tơring Tây Nguyên pơma atŭm. Giĕng Joh ayŏ - Tơmang pơhiơ̆ Măng Đen xơnăm 2022 đei lơ tơdrong jang nhen: Pơdăh joh ayŏ juăt jue Tây Nguyên; Pơdăh pơdreh chĭng chêng – hơxuang, dôm tơmam pơdreh tơdra juăt jue; Pơdăh joh hơri; Akŏm tra đăo; Pơdăh dôm tơmam kăp gĭt păng tơmam pai xa; Vei răk păng ming pơ-'lơ̆ng ơng rei hơdrĕch pơkao tơpông kăp gĭt hŭi kơ đei; Tơmang pơkao Anh Đào păng pơtôch Giĕng Joh ayŏ - Tơmang pơhiơ̆ Măng Đen xơnăm 2022 noh Tơdrong joh ayŏ xơng Puih mak 2023 đei hơnăn “Kon Plông Năr 'nao” pơgơ̆r ăh kơmăng năr 31/12/2022.