Vang thi hao thŏng nan plt Kon Tum pơih xă sơnăm ‘nâu đei 11 khul hăm 60 ‘nu bơngai thi. Dôm khul hao thi thŏng nan truh đơ̆ng 9 xăh, phường kơ plt Kon Tum păng 2 apŭng: Sa Thầy, Ia H’Drai. Dôm khul thi hao thŏng nan thi 2 jăl ‘nŏh 200m păng 1.500m.

Tơdrong thi âu vă dôm bơngai thi tơƀâp, pơma nuh, chĕp vei păng tưk tơ-iung dôm tơdrong tơplŏng kơdâu đơ̆ng hơdrĕch kon kông, pơjing jơhngâm hưch hanh pơjei băl ƀât blŭng sơnăm ‘nao păng chơt hơ-iă tơbăt 110 sơnăm pơjing dêh char Kon Tum. 

Đơ̆ng rŏng dôm vŏng thi tôch hơ-iă, mă hơtuch 2 khul thi ăn xăh Kroong, plt Kon Tum iŏk đei yaih như̆k thi hao hrĕnh 200m; 2 khul thi ăn xăh Sa Bình, apŭng Sa Thầy iŏk đei yaih như̆k thi hao hrĕnh 1.500m. Anih pơgơ̆r hơpăh tơmam ăn Khul đei thŏng nan vang thi lơ hlŏh, ‘nŏh khul thi xăh Sa Bình, păng khul thi xăh Kroong iŏk đei yaih như̆k đĭ đăng khul.