Lơ̆m 2 xơnăm kơ âu, jâ̆p dêh char hlôi hơmet đei 137 hơmrŭk chĭng chêng, hơgơ̆r ăn rim thôn, pơlei kon kông tơ̆ tơring; pơih 143 lăm pơtho pơdreh chĭng chêng, hơsuang. Truh dang ei jâ̆p dêh char Kon Tum hlôi đei 409 thôn, pơlei kon kông tơ̆ tơring hơmet ming rông kiơ̆ khôi xo – minh anih kăp Gĭt hăm tơdrong akŏm joh ayŏ chĭng chêng kơ kon pơlei.

Atŭm hăm noh dêh char Kon Tum pơm kiơ̆ lơ tơdrong jang nhen: pơih lăm pơtho găh kih thuơ̆t pơdreh chĭng chêng, hơsuang; pơtho găh joh ayŏ lơ̆m trưng phôh thŏng, pơgơ̆r pơlong pơdreh chĭng chêng vă pôk pơ-ư, hơlêm hăm đe ngê̆ nhơ̆n chă pơtho pơdjoi mŭk drăm joh ayŏ chĭng chêng ăn kon mon kon xâu.