Gơ măng hei (23/10), Kơ dră jang lơ̆m Anih tơm Chinh trĭ, Kơ dră chĕp kơ̆l Hnam hŏk Chinh trĭ quốc gia Hồ Chí Minh Nguyễn Xuân Thắng vang truh pơm lêh hơ păh tơ mam ăn tơ drong thi chih ƀai tơ blang găh vei lăng đon tơ chĕng đơ̆ng Đảng, tơ jră plơ̆, hŭt lê̆ dôm đon tơ chĕng ưh kơ trŏ, hơ rĕh băl ‘măng mă 2, sơ năm 2022.

Lêh hơ păh tơ mam ăn khul grŭp chih rơ gei

Tơ drong thi iŏk đei hlŏh 116 rơ bâu ƀai chih. Anih pơ gơ̆r chă rơih, hơ păh 12 yaih A; 20 yaih B; 30 yaih C; 40 yaih pơ čhơp jơ hngâm; 20 ‘nu bơ ngai chih/grŭp chih ‘nŏh jĭ đe đoàn viên, druh dăm đei ƀai chih ‘lơ̆ng đei hơ păh ăn tơ mam tôch hơ mĕng păng 15 yaih hơ păh ăn Khul chih rơgei tơ̆ dôm anih jang, khul grŭp, tơ ring tơ lĕch jang kiơ̆ ‘lơ̆ng tơ drong thi păng đei lơ ƀai chih rơ gei ‘lơ̆ng.

Pơ ma lơ̆m lêh hơ păh tơ mam, ƀok Nguyễn Xuân Thắng pơ ma hơ dăh: lơ ƀai chih hlôi chih tơ blang ‘moi kiơ̆ yăn âu tôch gĭt kăl, vă hơ nơ̆ng hơ len năng, pơ tôch tơ drong jang vei lăng đon tơ chĕng đơ̆ng Đảng, tơ jră plơ̆ dôm đon tơ chĕng, nơ̆r pơ ma ưh kơ trŏ, pơm tơ blĕk băl lơ̆m khei ‘năr âu ki, tơ lĕch đei trong jang lăp ‘lơ̆ng vă hơ tŏk tơ drong đei yoa mưh bơ̆ jang tơ drong jang chinh trĭ gĭt kăl  âu tơ̆ hơ năp kơnh”.