VOV4.Bahnar - ‘Năr (19/5), tơ̆ Đồng Tháp pơ gơ̆r lêh pơ kao Sen Đồng Tháp ‘măng mă I - sơ năm 2022, tơ drong ‘nâu đei pơ gơ̆r trŏ ƀât tơ băt 132 sơ năm năr rơ nĕh Ƀok Hô (19/5). 

Pơ kao Sen - pơ kao ‘lơ̆ng rŏ tơ băt ăn groi tĕh Sen Hồng

Hăm hơ năn “Pơ kao Sen năr ‘nao”, Lêh pơ kao Sen Đồng Tháp nhăk ba lơ tơ drong hơ pơi ‘mĕh jang tŏk đơ̆ng Đảng ƀô̆, khul kơ dră pơ gơ̆r păng kon pơ lei Đồng Tháp, chih pơ ‘yoi dơ̆ng tơ drong pơ jing păng roi tơ ƀôh hơ năn groi tĕh Sen Hồng. Lêh pơ kao Sen pơ gơ̆r ƀât mă rim tơ drong tĕch mơ dro, pơ vih pơ văn, chă tơ mang lăng vă tŏk hơ lơ̆k dơ̆ng đơ̆ng rŏng 1 khei ‘năr ƀơm ưh ‘lơ̆ng đơ̆ng jĭ COVID-19.

Ƀok Phạm Thiện Nghĩa, Kơ dră vei lăng kon pơ lei dêh char Đồng Tháp ăn tơ băt, Lêh pơ kao Sen mă âu ưh lăp pơm lăp hăm tơ drong truh lăng, ngôi pơ chơt, pơ chĕh tơ drong jŏh ayŏ kơ dŏ xoang đĕch, mă oei jing tơ drong ‘lơ̆ng vă akŏm dôm bơ ngai jang mŭk drăm găh pơ kao Sen, dôm bơ ngai hơ pơi ‘mĕh hơ nhăk pơ kao Sen roi tơ băt hăm bôl boăl lơ̆m apŭng plenh tĕh.

Dơ̆ng: Tơ blơ̆