Kiơ̆ kơ ‘noh, Lêh pơkao Ban  Điện Biên sơnăm 2024 đei pơgơ̆r tơklep hăm pơgơ̆r pơih blŭng Sơnăm tơmang lăng teh đak - Điện Biên hăm hơnăn “Vih tơ̆ tơring Pơkao Ban”. ‘Nâu jĭ tơdrong jang vă roi tơƀôh tơmang lăng Việt Nam pơma atŭm păng dêh char Điện Biên pơma hơdrô̆, tơgop bơ̆jang kiơ̆ tơdrong tơm pơjing Điện Biên jing hơnih truh tơmang lăng hơiă kơ tơring Trung du tơring groi kông păh Tu lơ̆m sơnăm 2025.

Hơdai hăm, jing tơdrong jang ‘lơ̆ng hơiă kơkuh chơt hơiă Tơbăt 70 sơnăm năr Jơnei Điện Biên Phủ (07/5/1954 - 07/5/2024). Kiơ̆ kơ Khŭl pơgơ̆r, tơdrong jang gô pơm tơiung joh ayŏ kơdŏ soang ‘lơ̆ng, tơƀôh dôm tơdrong kăp gĭt joh ayŏ păng tơmam tơmang lăng ‘lơ̆ng kơ groi teh, kon bơngai Điện Biên - Tây Bắc.