VOV4.Bahnar - ‘Năr brei, 25/1, jĭ ‘năr 23/12 âm, kiơ̆ tơ drong juăt đơ̆ng sơ̆ kơ bơ ngai Việt jĭ năr yang Kong nuh hao ka chep tŏk tơ̆ plenh vă tơ roi rim tơ drong đei lơ̆m unh hnam ăn Yang plenh. Yoa thoi nŏh, rim sơ năm truh năr ‘nâu, kon pơ lei jơ̆p tơ ring lơ̆m tĕh đak hơ met tơ mam, soi vă ba trong yang Kong nuh brŏk tơ̆ plenh.

Sơ năm ‘nâu yoa jĭ Covid 19 kơ na kon pơ lei hơ met tơ mam soi ưh kơ tih, ‘mơ ‘met mă lei oei đei tôm, hăm ƀĕnh jơ hngâm đon lui yom. Mă đơ̆ng jĭ tôch krê hơ mơt mă lei kon pơ lei oei adrin vei kơ jăp tơ drong juăt ‘lơ̆ng, ‘nŏh jĭ hơ chăng ka chep tơ̆ đak đơ̆ng rŏng kơ soi hăm đon hơ pơi ‘mĕh iŏk đei lơ tơ drong pŭn ai, hiôk chơt lơ̆m sơ năm ‘nao. Ba yang Kong nuh tŏk tơ̆ plenh, hŭt lê̆ dôm tơ drong gleh hrat, ơh sơ ‘ngon đơ̆ng sơ năm so pơm ăn jơ hngâm đon rim bơ ngai hiôk hơ ‘yơch ƀiơ̆ vă yak mât lơ̆m 1 sơ năm ‘nao pŭn ai păng hiôk hian.

Dơ̆ng: Tơ blơ̆