VOV4.Bahnar - Tơ̆ Hà Nội ‘nao pơ gơ̆r Tơ drong jang pơ gơ̆r joh ayŏ kơ dŏ soang “Hơ nglŏng rơ ngei hiôk hian” 2022 ƀlep ƀơ̆t 77 sơ năm kach mang khei 8 păng Quốc khánh 2/9 hlôi tơ roi nơ̆r pơ ma pôk pơ ư teh đak, hơ drĕch hơ drŭng kŭm hăm dôm tơ drong kăp gĭt đơ̆ng 1 hơ drĕch hơ drŭng đei hơ năn “Việt Nam - Hơ drĕch hơ drŭng pran kơ tang, hŭt hơ kâu yua kơ tơ drong trŏ ƀlep” păng tơ drong mă 2 ‘noh “Việt Nam - Tơ drong hơ iă đơ̆ng rơ ngei păng hơ tŏk tơ iung”. Khŭl pơ gơ̆r hlôi roi tơ ƀôh dôm ƀai chih hăm hơ năn “Teh đak kơ dôm bơ ngai nuih mơng” păng “Dôm bơ ngai nuih mơng kơ chăl ‘nao”, hăm lơ um rup, tơ mam kăp gĭt tơ ƀôh dơ̆ng dôm tơ drong hơ iă nuih mơng, dôm ƀăng phim tơ roi kơ tơ drong chhôk ‘nă ‘nao kơ teh đak lơ̆m tơ drong rơ ngei. Mă loi ‘noh jĭ lơ̆m jơ năr pơ gơ̆r tơ drong jang “Hơ nglŏng rơ ngei hiôk hian” sơ năm ‘nâu, Khŭl pơ gơ̆r asong 20 tơ pu tơ mam ‘noh hla ar ‘mơ ‘met jên păng dôm hơ chô̆ pơ kao ‘lơ̆ng hơ iă truh hăm dôm bơ ngai kră jang kach mang sơ̆, dôm mĕ Việt Nam nŭih mơng, đe lĭnh ƀô̆ đô̆i, đe lĭnh jĭ rơ ka, lĭnh so kiơ̆ rim jơ hnơr iung tơ blăh. 1 tơ pu tơ mam hăm jên măt đei kơ jă 10 triệu hlak jên đơ̆ng jên tơ pôl vang tơ gop.

Lơ tơ drong jang tơ băt 77 sơ năm Quốc khánh 2/9 tơ̆ pơ lei tơm HCM

Ƀok Võ Trọng Nam, Phŏ Kơ dră vei lăng jŏh ayŏ kơ dŏ xoang- tơ plŏng kơ dâu păng chă tơ mang lăng plt HCM ăn tơ băt, sơ năm ‘nâu plt đei trong pơ gơ̆r lêh “Tết rơ ngei” tơ băt 77 sơ năm năr Kăch mang khei 8 păng năr Quốc khánh tĕh đak Cộng hoà xã hội chủ nghĩa Việt Nam, 77 sơ năm năr Sài Gòn iung tơ blăh tơ gar iŏk tơ drong chĕp kơ̆l pơ gơ̆r hăm lơ tơ drong jang. Hơ drô̆ lơ̆m ‘năr 2/9, plt đei lơ tơ drong jang nhen: iŏk Tông blông păr dui hơ tŏk Hla kơ tơ̆ jih đak krong Sài Gòn; kơ tăh yu, tơ plŏng kơ dâu, hơ ri hơ xoang. Mă loi ‘nŏh jĭ tơ drong hơ ri hơ xoang tơ̆ kơ măng tơ̆ trong kơ phô̆ yak jâng hŏh Nguyễn Huệ pơ vih ăn lơ kon pơ lei truh lăng. Kiơ̆ ƀok Võ Trọng Nam, ƀlep ƀât Quốc khánh sơ năm ‘nâu kŭm jing 1 sơ năm plt yak hlŏh jĭ hơ buh, plt ưh đei prăh kơ mlăi pơ kao nhen dôm sơ năm adrol ki mă vă ‘măn ăn jơ năr nai dơ̆ng. Đĭ đăng vă akŏm ăn tơ drong vei lăng tơ drong arih xa ăn kon pơ lei ‘lơ̆ng ƀiơ̆.

Lêh păr Tông blông (khinh khí cầu) tơ̆ An Giang

Kơ kuh chơt hơ iă tơ băt 77 sơ năm Năr Quốc khánh 2/9 păng yak truh tơ băt 190 sơ năm pơ jing dêh char An Giang, apŭng Tri Tôn  pơ gơ̆r Lêh păr Tông blông (khinh khí cầu) Tri Tôn sơ năm 2022 păng păr yu, păr klang kơ măy, ưh kơ đei kơ măy, hơ dai hăm Lêh pơ jei rơ mo Bảy núi… hăm hơ năn “Păr tŏk bŏk pơ yan lêh”. ‘Nâu jĭ lêh păr Tông blông ‘măng mă blŭng đei pơ gơ̆r tơ̆ tơ ring Pơ mơ̆t pơ băh.

Lêh akŏm vă jê̆ 20 tŏ Tông blông (khinh khí cầu) lơ kơ loăi. Lơ̆m noh, đei 14 tŏ tông blông jăl I păr hơ tol kơ jung đơ̆ng 20-40m păng 3 tŏ tông blông jăl 7; 2 tŏ tông blông păr chơ tơ moi lăng cham char Tri Tôn kơ jung 50m... Mă loi ‘noh, pơ gê ‘năr 2/9, akŏm hloh 600 ‘nu bơ ngai ‘noh đei: kang ƀô̆, bơ ngai jang teh đak, khŭl linh, ƀok phât păng rim răih kon pơ lei, dơ̆ng pơ rĕng jing rup la kak Việt Nam tơ̆ cham pơ jei rơ mo, apŭng Tri Tôn, vă vang truh pơm Lêh chao kơ, hăm 1 Hla kơ Teh đak xă 200m2 đei lê̆ kơ jung 50m tơ̆ kơ pal plĕnh; pơ jing hơ nih tôch kơ ‘lơ̆ng tơ̆ hơ la jơ̆ng Phụng Hoàng vă kơ kuh chơt hơ iă Quốc khánh 2/9.  ‘Ngoăih kơ ‘noh, Lêh ‘măng âu pơ gơ̆r gơ măng Pơ kao păng dôm tơ drong joh hơ ri hơ soang, tơ drong jang pơ dă tơ ƀôh, dôm kơ deng tơ mam sa păng pơ gơ̆r dôm tơ drong ngôi pơ chơt kră sơ̆ đơ̆ng bơ ngai Khmer vă roi tơ ƀôh um rup Tri Tôn truh hăm tơ moi.

Thuem hăm Dơ̆ng: Tơ blơ̆