Lơ̆m khei 7 âu ki, hơnơ̆ng rim pơgê năr mônh, năr pêng, năr đăm rim giĕng, vă jê̆ 30 ‘nu oh hŏk jăl mônh păng jăl ƀar hơkŭm tơ̆ hnam kơjung đe ama Jiwon, tơ̆ plei Akŏ Dhông, plt Buôn Ma Thuột, dêh char Đắk Lắk. Tơ̆ âu đei 2 lăm pơtho nơ̆r Anh ưh đei iŏk jên yoa đe sinh viên truh tơgŭm pơih lơ̆m pơyan he. Vang truh hăm lăm hŏk đe oh đei ôn dơ̆ng ƀai păng pơtâp pơma nuh hăm nơ̆r Anh kiơ̆ đơ̆ng dôm tơdrong pơm ngôi, ƀai hơri.

Oh Đỗ Thanh Nhã Byă (10 sơnăm), tơ̆plei Akŏ Dhông chơt hơiă tơroi: “Kon đei hŏk nơ̆r Anh ưh đei hiong jên yoa đơ̆ng đe mŏ oh sinh viên pơtho. Kon ƀôh tôch đei yoa. Lơ̆m pơyan he ‘nâu kon oei đei hŏk pơhrăm dơ̆ng lơ tơdrong nai hai, kăl loi ‘nŏh kon hơpơi ‘mĕh gơ̆h pơma tôm nơ̆r păng hŏk đei trong pơma xa hăm rim bơngai jŭm dăr, dăh mă bơngai đơ̆ng teh đak đe”.

Oei hăm oh H’Da Rin Ênuôl (15 sơnăm) tơ̆ plei Alê B, phường Ea Tam, plt Buôn Ma Thuột, dôm năr pơdơ̆h he roi hơiă hlŏh dơ̆ng mưh oh đei truh hăm dôm tơdrong jŏh ayŏ kơ dŏ xoang so kơ bơngai Rađe kiơ̆ đơ̆ng lăm pơtho hơxoang yoa Anih roi tơbăt, jŏh ayŏ kơ dŏ xoang păng tơplŏng kơdâu plt Buôn Ma Thuột pơgơ̆r. H’Da Rin tơroi: lơ̆m 1 khei âu ki, oh kŭm hăm đe bôl boăl chă hơlen năng dôm tơdrong juăt, tơdrong et soi, ngôi pơchơt kơ bơngai Rađe, dôm tơdrong lêh, dôm tơdrong đei yoa tơdrong hơxoang păng dôm ƀai hơxoang. Kiơ̆ kơ ‘nŏh tơgŭm ăn oh roi hlôh vao păng roi ‘mêm kơ tơdrong jŏh ayŏ kơ dŏ xoang đơ̆ng hơdrĕch hơdrung dơ̆ng.

“Oh hlôi hŏk iŏk đei lơ tơdrong ƀiơ̆ găh tơdrong jŏh ayŏ kơ dŏ xoang đơ̆ng hơdrĕch nhôn. Oh ‘mĕh băt dơ̆ng lơ ƀai hơxoang păng gơ̆h xoang hơdai hloi hăm dôm ƀai đơ̆ng đe thây kô pơtho kŭm nheh chă pơtho dơ̆ng ăn đe ŏh đơ̆ng rŏng. Đơ̆ng noh lơ̆m dôm tơdrong lêh, et soi dăh mă đei tơdrong kiơ ‘nŏh tơ̆ pơlei, tơ̆ phường ‘nŏh nhôn gơ̆h sơđơ̆ng jơhngâm hơxoang ăn đe năng”.

Mĭnh tơdrong jang nai kŭm sơng đei lơ hơioh kon kông tơ̆ Đắk Lắk truh akŏm lơ̆m pơyan he. ‘Nŏh jĭ “Pơm trăi chih pơcheh tơdrong pơđơ̆k” yoa Khul chih Văn dêh char Đắk Lắk pơgơ̆r. Sơnăm ‘nâu, tơdrong jang ‘nâu đei vă jê̆ 40 ‘nu hŏk tro vang akŏm. ‘Nâu jĭ đe hŏk tro đei rơih đơ̆ng dôm tơdrong thi hŏk tro rơgei, thi chih kơ thơ lơ̆m apŭng plenh teh (UPU), dôm hŏk tro ‘mĕh chih pơđơ̆k tơ̆ 24 hnam trưng jăl 2 păng jăl 3 lơ̆m dêh char.

Kŭm hăm đei dôm bơngai chih văn, chih pơđơ̆k, čhơ̆ rup pơtho tơƀôh găh chih pơcheh, đe oh oei đei năm tơ̆ tơring păng ngôi pơchơt hăm đe linh vei lăng tơring sơlam; chă hơlen năng tơdrong juăt đơ̆ng bri, đơ̆ng rôih tơ̆ Pơgar teh đak Yok Đôn; ngôi pơchơt hăm đe hơioh tơ̆ tơring sơlam; truh năng tơ̆ Anih kanh sat tang găn, pĭt unh xa păng dŏng tơgŭm bơngai răm, Công an dêh char Đắk Lắk… Kiơ̆ đơ̆ng noh, tơgŭm ăn đe oh tơiung đei jơhngâm hưch hanh, chih răk dôm tơdrong kăl ăn tơdrong chih pơđơ̆k păng čhơ̆ rup.

Oh Bế Thị Thu Uyên (13 sơnăm, bơngai Tày) tơ̆ xăh Ea Hđing, apŭng Cư Mgar tơroi, dôm năr vang truh hăm pơm trăi tơgŭm ăn oh hlôh vao lơ tơdrong ‘nao, đơ̆ng noh roi ‘mêm păng băt bơnê kơ dôm tơdrong mă kơdih kâu oei xa yoa: “Nhôn đei truh năng lơ tơdrong, pơtih gia nhen chă hơlen năng tơ̆ Anih ‘măn răk tơmam Apŭng plenh teh chĕh, Anih ‘măn răk Ama H’Mai, năm truh tơ̆ tơring sơlam Việt Nam - Campuchia, Kơđông linh Bô Heng păng lơ tơdrong jang nai hai. Lơ̆m noh, oh ƀôh hơiă hlŏh jĭ năm tơ̆ kơđông linh Bô Heng păng pel ngôi jrăng sơlam Việt Nam - Campuchia. ‘Nâu jĭ ‘măng mă blŭng oh đei năm truh tơ̆ tơring sơlam, đei pel jrăng sơlam, sư pơm ăn oh đei lơ tơdrong hưch hanh, tôch chrih”.

Yă Niê Thanh Mai, Kơdră vei lăng Khul chih pơđơ̆k Đắk Lắk akhan, mă đơ̆ng jơnăr jur tơ̆ tơring ưh kơ đunh mă lei đe oh tơƀôh hơdăh jơhngâm đon hưch hanh, čhôk ‘nă hăm rim tơdrong jang. Kiơ̆ đơ̆ng rim sơnăm, tơdrong jang đei tơplih ƀiơ̆, ưh kơ đei lăi lăi băl vă đe oh truh hăm trăi hơnơ̆ng ƀôh hơiă, đei tơdrong chơt ‘nao, jô̆ hloi hăm đe oh năm adrol ki bơih: “Nhôn ƀôh đe oh tôch hơiă mưh đe duch, đe ma roi tơƀôh dôm tơdrong juăt ‘lơ̆ng đơ̆ng dôm hơdrĕch kon kông păng jơhnơr arih, đe oh chơgăm mơ̆ng, chih iŏk tôm tơdrong. Pơtơm đơ̆ng dôm tơdrong iĕ hlŏh nhen rim ‘măng năm, dôm ‘măng tơbâp hăm đe ma ƀô đô̆i, đe ma kanh sat tang găn, pĭt unh xa, dôm bơngai oei ‘măn đĭ jơhnơr arih păng sơnăm păh iung đơ̆ng kơdih vă plang pơyơ̆r păng tơgop ăn teh đak”.

Ƀok Mai Văn Chuyền, tơ̆ xăh Ea Mdroh, apŭng Cư Mgar, đei kon vang truh akŏm akhan, dôm tơdrong jang thoi âu hơnhăk ba lơ tơdrong tôch ‘lơ̆ng. Vih đơ̆ng dôm tơdỏng ngôi pơchơt thoi âu, ƀok ƀôh kon hơ ‘lơ̆p tơplih ‘lơ̆ng, jing bơngai hơđơ̆ng jơhngâm păng kơchăng chă pơma nuh hăm dôm bơngai jŭm dăr lơ ƀiơ̆: “Lơ̆m jơnăr kon mon vang truh akŏm păng vih dơ̆ng tơ̆ hnam ‘nŏh ƀôh mon roi chu yom, tơdrong pơma xa, ngôi pơchơt đei tơplih ‘lơ̆ng. Lăng sư chă pơma xa hăm khul pơgơ̆r mưh vang akŏm lơ̆m Grŭp Zalo ‘nŏh ƀôh khul pơgơ̆r păng đe thây kô pơtho tôch hơlen, tôch hơdăh kơ na đei yoa ‘lơ̆ng hăm đe kon mon. ‘Nŏh kŭm jing 1 tơdrong tôch đei yoa hăm mon lơ̆m pơyan pơdơ̆h he”.

Pơyan pơdơ̆h he vă đĭ bơih, mă lei hăm đe hơioh bơngai kon kông tơ̆ Đắk Lắk, dôm tơdrong chă hơlen năng găh joh ayŏ kơ dŏ xoang hlôi pơih đei tơdrong ‘lơ̆ng vă gơ̆h chă hơlen năng roi lơ ƀiơ̆ dôm tơdrong juăt ‘lơ̆ng hơiă đơ̆ng dôm hơdrĕch kon kông. Kiơ̆ đơ̆ng noh tưk tơiung dơ̆ng ăn đe oh jơhngâm đon ‘mêm kơeng kơ tơdrong jŏh ayŏ kơ dŏ xoang, vei rong jơhngâm đon ‘lơ̆ng, vă pơyan pơdơh he đei lơ tơdrong chơ thơiă păng đei yoa./.