Giĕng jŏh ayŏ kơ dŏ xoang – Chă tơmang lăng Gia Lai sơnăm 2023 vă pơgơ̆r đơ̆ng ‘năr 11 - 19/11 tơ̆ plt Pleiku, apŭng Chư Păh păng apŭng Ia Grai (dêh char Gia Lai) đei dôm tơdrong nhen: Lêh pơih blŭng ăn Giĕng jŏh ayŏ kơ dŏ xoang – Chă tơmang lăng Gia Lai sơnăm 2023; Tơdrong thi tôn chĭng chêng dêh char Gia Lai sơnăm 2023 hăm tơdrong vang akŏm đơ̆ng vă jê̆ 1.000 ‘nu bơngai tôn truh đơ̆ng 5 dêh char tơring Tây Nguyên. Jơnŭm kơchơ tĕch mơdro păng roi tơbăt dôm tơmam ‘lơ̆ng đơ̆ng choh jang xa tơ̆ Gia Lai;

Giĕng Pơkao dur yoăn – Kông unh Chư Đang Ya sơnăm 2023; Thi kơdâu “Gia Lai city trail 2023 – Hơpo kơ bri kông”; tơdrong thi hao thŏng nan tơ̆ đak krong Pô Cô pơjei băl Kup A Sanh păng Tơdrong tôn chĭng chêng apŭng Ia Grai; Thi hrŭk pơguăng hơbăn ao kon kông, thi hơri hơxoang… Giĕng jŏh ayŏ kơ dŏ xoang – chă tơmang lăng Gia Lai sơnăm 2023 đei pơgơ̆r vă roi tơbăt dôm kơjă kăp gĭt đơ̆ng jŏh ayŏ kơ dŏ xoang ‘lơ̆ng hơiă kơ dêh char Gia Lai, mă loi jĭ tơdrong tôn chĭng chêng Tây Nguyên.