‘Măng jang vă man rok rup rôih, sem tơrong tơƀôh ăn um ai dêh char Đắk Lắk. ‘Măng jang găh Pơmât plt Buôn Ma Thuột đei man tơ̆ jăl trong dêh char kơsô̆ 1, hơlam kơ phường Thành Nhất hăm xăh Ea Nuôl, apŭng Buôn Đôn. 2 tŏ jrăng jĭ 2 tŏ rôih man dơ̆ng. Kơ̆l rôih păng pơla rôih tưk tơ̆ kơpal, gơn bơbŭng pơsei kơmâu kok tor kơjung 14 m, đơ̆ng tĕh tŏk tơ̆ kơpal kơjung 8,5m. ‘Măng jang găh pơmât Buôn Ma Thuột đei chô̆ chư điên tư 2 păh măt, iŏk yoa kơmăy unh đeng kơmâu full led kơdâu chư. Akŏm đĭ đăng jên man hlŏh 5,5 ti. 

Kiơ̆ ƀok Trần Đức Nhật, Phŏ Kơdră vei lăng kon pơlei plt Buôn Ma Thuột, ‘măng jang găh pơmât plt ưh lăp pơm lăp hăm dôm tơdrong ‘lơ̆ng păng kơjăp đĕch, mă oei tơƀôh hơdăh tơdrong juăt đơ̆ng bri brăh păng kon bơngai tơ̆ tơring, chĕp vei dôm tơdrong juăt kăp gĭt đơ̆ng sơ̆ păng vei lăng ‘lơ̆ng rôih. ‘Nâu jĭ ‘măng jang vă tơbăt 120 sơnăm pơjing dêh char Đắk Lắk păng 120 sơnăm Buôn Ma Thuột đei pơjing păng jang tŏk.