Lơ nơ̆r pơtruh đơ̆ng kan ƀô̆, đảng viên păng kon pơlei sơkơ̆t, âu jing tơmam hơpah tơgăl hloh mă Đảng, Jơnŭm pơgơ̆r teh đak asong ăn kơdih po Ƀok Tổng Bí thư Nguyễn Phú Trọng hăm dôm tơdrong jang đei jơnei kăp gĭt hloh lơ̆m lơ kơchư̆k jang đơ̆ng Ƀok Tổng Bí thư hăm tơdrong jang kăch mạng kơ Đảng, Jơnŭm pơgơ̆r teh đak păng kơ teh đak bơ̆n.

PGS.TS Nguyễn Trọng Phúc, sơ̆ jang Kơdră Viê̆n Lĭch sử Đảng, Hŏk viê̆n Chĭnh trĭ Kuôk ya Hồ Chí Minh ră hơdah, găn ga lơ tơdrong jang đei Đảng, Teh đak pơjao iŏk jang lơ sơnong jang kơdră kăp gĭt mă nơ̆r pơma xa dah mă jang tơpă, Ƀok Tổng Bí thư Nguyễn Phú Trọng adoi đei lơ tơdrong plang kăp gĭt hloh, tơdrong mă âu hlôi đei tôm Đảng, tôm kon pơlei bơ̆n, jô̆ hlôi lơ bôl boăl apŭng plenh teh băt truh, pôk bơnê: “ ‘Nâu jing Mê đai đei đơ̆ng chăl Việt Nam dân chủ Cộng hòa, Mê đai Sao Vàng ‘măn pôk ăn bơngai jang hơgei kăp gĭt hăm tơdrong jang kăch mạng kơ Đảng, Jơnŭm pơgơ̆r teh đak mă đei lơ tơdrong plang lơ̆m pơm jang đơ̆ng kơdih bơngai jang hơgei, sơkơ̆t tơdrong tơgop tih tên đơ̆ng Ƀok Tổng Bí thư hăm tơdrong pơm jang kơ Teh đak bơ̆n”

Ră hơdah tơdrong tơguăt tơguăl tôm kon pơlei păng tơdrong lui ngeh hăm tơdrong pơgơ̆r đơ̆ng Đảng Cộng sản Việt Nam chĕp kơ̆l noh Ƀok Tổng Bí thư Nguyễn Phú Trọng đơ̆ng lơ kon pơlei lơ̆m jơ̆p teh đak lơ̆m khei năr âu ki, yă Bùi Thị An, Kơdră Jơnŭm jang đe drăkăn hŏk kơjung Hà Nội, Kơdră Kâu lak ƀô̆ Drăkăn jang khua hŏk kơ Jơnŭm asong jang pơlei tơm Hà Nội tơroi ah đei băt Ƀok Tổng Bí thư Nguyễn Phú Trọng đei iŏk Mê đai Sao vàng băt đơ̆ng tơdrong tơroi tơbăt lơ̆m tơpôl: “Mê đai Sao Vàng, Mê đai kăp gĭt hloh kơ teh đak Việt Nam đei pơjao ăn kơ Ƀok Tổng bí thư Nguyễn Phú Trọng dang tơƀôh tơdrong pôk bơnê đơ̆ng tôm đảng, tôm kon pơlei, tôm anih jang linh hăm Ƀok Tổng bí thư.”

Lơ nơ̆r pơtruh sơkơ̆t hơdah, lơ̆m 3 jăl jang âu ki, đơ̆ng jăl 11 (sơnăm 2011) truh dang ei, Ƀok Tổng Bí thư Nguyễn Phú Trọng hlôi đei lơ tơdrong plang tih tên hăm tơdrong jang hơtŏk tơ-iung teh đak, mă kăl lơ̆m khei năr hơtŏk pran jang kiơ̆ trong ‘nao dang ei, jang hadoi lơ̆ma pŭng plenh teh, pơm jang kiơ̆ tơchơ̆t gah vei lăng Teh đak lơ̆m chăl ‘nao dang ei. Mă kăl, Ƀok Tổng Bí thư đei lơ tơdrong plang tih tên gah nơ̆r pơma xa, hăm tơdrong hơlen chih akŏm păng ƀôh băt tơdrong ‘nao noh tak phâm: “Minh ƀar tơdrong pơma oei đei ƀôh gah chu nghĩa xah hô̆i tơ̆ Việt Nam”. ‘Nâu jĭ tơdrong akŏm đei lơ̆m tơdrong tơplih ‘nao tơguăt hăm jăl trong jang kiơ̆ XHCN mă Ƀok Hô hlôi rơih iŏk. Kơyươ noh, tơmam hơpah kăp gĭt đơ̆ng Đảng păng Teh đak pôk ăn kơ Ƀok Tổng Bí thư Nguyễn Phú Trọng jing tơdrong sơkơ̆t păng hmach bơnê hăm tơdrong plang tih tên đơ̆ng Ƀok Tổng Bí thư lơ̆m lơ tơdrong jang. PGS.TS Đào Duy Quát – sơ̆ jang Phŏ Kơdră Anih jang Tuyên giáo Trung ương tơroi: “Đảng, Teh đak bơ̆n tơbang tơchơ̆t pôk Mê đai Sao Vàng ăn kơ Ƀok Tổng bí thư Nguyễn Phú Trọng jing minh tơdrong sơkơ̆t đơ̆ng Đảng, Teh đak păng kon pơlei bơ̆n hăm tơdrong plang tih tên păng dôm tơdrong tơgop kăp gĭt đơ̆ng Ƀok Nguyễn Phú Trọng hăm tơdrong jang kăch mạng  păng tơdrong jang tơplih ‘nao kơ teh đak bơ̆n, kon pơlei bơ̆n; âu jing tơdrong sơkơ̆t hmach bơnê kơ tơdrong tơgop kăp gĭt gơh hơgei hloh hăm tơdrong jang kăch mạng kơ kon hơdrung hơdrĕch bơ̆n”.

Ƀok Y Nuel Niê, kơdră pơlei Ako Dhong, phương Tân Lợi, pơlei tơm Buôn Ma Thuột, dêh char Đăk Lăk chơt hơ-iaw ah băt đei Anih tơm Chĭnh trĭ hlôi tơchơ̆t pôk Mê đai Sao Vàng ăn kơ Ƀok Tổng Bí thư Nguyễn Phú Trọng. Ƀok Y Nuel tơroi: “Ƀok Tổng Bí thư Nguyễn Phú Trọng đei iŏk Mê đau Sao Vàng noh tơgăl tơpă. Jơhngơ̆m plang tih tên kơ Ƀok noh tơjră xa pơjĭp pran kơtang hloh, soh ‘long unh ‘noh athei soh đơ̆ng tơm hloi. Truh dang ei tơdrong jang tơjră xa pơjĭp kơ Ƀok đei hơnei tih tên".

Đei băt Anih tơm Chĭnh trĭ hlôi Tơchơ̆t pôk Mê đai  Sao Vàng ăn kơ Ƀok Tổng Bí thư Nguyễn Phú Trọng, ƀok Trương Duy Cảnh, 70 sơnăm, 44 sơnăm jang đảng, hnam tơ̆ kueng kơphô̆ 2, phương Lê Lợi, pơlei tơm Kon Tum, dêh char Kon Tum, ăn tơbăt: “Tơdrong mă Ƀok Tổng Bí thư Nguyễn Phú Trọng đei Teh đak pôk Mê đai Sao Vàng ‘noh tơgăl tơpă. Đon bơnôh Ƀok noh đon bơnôh kơ bơngai cộng sản băt ‘mêm kơ kon pơlei. Mă kăl lơ̆m tơdrong jang tơjră xa pơjĭp kơ Đảng păng Teh đak mă kơtă noh Ƀok Nguyễn Phú Trọng pơm Kơdră Jơnŭm jang tang găn păng tơjră xa pơjĭp kơ Đảng, Ƀok hlôi pơgơ̆r jang kơjăp, ưh đei kơdŭn dŏng dôm bơngai pơm kơnê̆, ưh đei pơyua ăn kơdih. Ƀok pơm ăn kon pơlei lui, Đảng lui, tơdrong jang mŭk drăm xah hô̆i chu nghĩa hơtŏk pran. Lơ jơhnơr kan ƀô̆ yak đơ̆ng rŏng kơ Đảng athei hŏk pơhrrăm, rok ƀoi vă tơgăl jing bơngai đảng viên, tơgăl jing kan ƀô̆, tơgăl jing kon pơlei teh đak Cộng hoà Xã hội Chủ nghĩa Việt Nam”.