Hloh 90 sơnăm, mă lei Ngê̆ nhơ̆n ưu tŭ Lò Văn Biến, bơngai Thái tơ̆ pơlei Cang Nà, phương Trung Tâm, thĭ xah Nghĩa Lộ, dêh char Yên Bái rim năr adoi oei hăt hot hăm tơdrong pơtho chư Thái kră sơ̆ păng dôm tơdra xoè kră sơ̆ kơ bơngai  Thái ăn kan ƀô̆ păng kon pơlei tơ̆ tơring. Ƀok ăn tơbăt, lơ̆m khei năr pơgơ̆r kăch mạng,  pơgơ̆r tơdrong jang tơ-iung păng hơtŏk teh đak, Đảng bơ̆n hơnơ̆ng lăng tơgĭt păng sơkơ̆t hơdah sơnong kơ joh ayŏ.

Tơ̆ Hop akŏm joh ayŏ jơ̆p teh đak đei pơgơ̆r ah khei 11/2021, Ƀok Tổng Bí thư Nguyễn Phú Trọng adoi lơ ‘măng ră hơdah “Joh ayŏ noh jing tơdrong dơnơm kơ tơpôl, joh ayŏ oei noh kon pơlei oei, joh ayŏ hiong noh kon pơlei hiong”. Hram tơdrong mă noh, atŭm hăm tơdrong lăp, pôk pơ-ư gah dôm tơdrong ‘lơ̆ng rŏ joh ayŏ kon kông po, ƀok hlôi akŏm đĭ jơhnơr hơrih ăn tơdrong hơlêm, tơroi tơbăt, hơmet pơ-‘lơ̆ng dôm um ai joh ayŏ Thái. Ƀok Biến tơroi: “Jing bơngai Thái bơih noh rim bơngai athei băt kon kông po đei dôm tơdrong kăp gĭt yă kiơ. Bơngai kră, băt tơdrong noh athei pơtho pơtoi vă rim bơngai ƀôh mă ƀŏk hơlen”.

‘Nguaih kơ ƀok Biến, tơ̆ thĭ xah Nghĩa Lộ, dêh char Yên Bái hrei âu, tơ̆ dôm pơlei pơla oei đei lơ đe mih ma, yă ƀok, đe mĕ hlôh vao kloh klĕch gah tơdrong joh ayŏ kăp gĭt kơ bơngai Thái, đơ̆ng chư chih truh tơ̆ tơdrong hơri boa, tơdra hơsuang, tơmam xa, tơdrong pơchơt kră sơ̆... Đe sư oei akŏm jơhngơ̆m vă vei răk, pơtho ăn kôn mon kon sau hăm tơdrong hơpơi ‘meh dôm tơdrong joh ayŏ noh oei ling lang hăm tơdrong hơrih.

Tơ̆ Sơn La – tơring teh đei 12 hơdrung ‘nhŏng oh hơtŭm hơrih jang xa, hram đon tơchĕng đơ̆ng Kơdră Hồ Chí Minh “Joh ayŏ pơchră trong ăn kon pơlei yak kiơ̆” păng kăp gĭt pơm kiơ̆ trong pơkăp đơ̆ng Đảng lơ̆m tơdrong jang hơtŏk joh ayŏ Việt Nam, lơ̆m noh đei kơdih po ƀok Tổng Bí thư Nguyễn Phú Trọng hlôi lơ ‘măng sơkơ̆t hơdah  “joh ayŏ oei noh kon pơlei oei, hiong joh ayŏ noh hiong kon pơlei”…dôm sơnăm kơ âu, rim jăl pơgơ̆r tơring păng kon pơlei tơ̆ âu hơnơ̆ng tơrĕk vei răk tơƀăk mong dôm kơjă joh ayŏ hăm dôm tơdrong jang kăp gĭt, hơdah. Yă Quàng Thị Xuyến, Kơdră Anih jang Joh ayŏ - Tơpôl, Hô̆i đŏng kon pơlei dêh char Sơn La adoi ăn tơbăt: “Truh dang ei, Hô̆i đŏng kon pơlei dêh char Sơn La hlôi keh đang tơbang 05 tơchơ̆t tơrĕk truh pơkăp tơgŭm vei răk tơƀăk mong dôm kơjă joh ayŏ kăp gĭt kơ kon pơlei. ‘Nguaih kơ noh, dôm tơchơ̆t tơgŭm hơtŏk joh ayŏ kon pơlei đei pơgep lơ̆m tơdrong tơchơ̆t jang kơ teh đak gah hơtŏk mŭk drăm – tơpôl tơring kon pơlei kon kông păng groi kông. Anih jang kơpal kơ Hô̆i đŏng kon pơlei dêh char adoi pơjao ăn dôm jơnŭm jang Hô̆i đŏng kon pơlei dêh char tơlĕch hơlen hơnơ̆ng kiơ̆ sơkơ̆t hăm tơdrong asong jên tơgŭm hăm dôm tơchơ̆t đei tơrĕk truh joh ayŏ”

Lơ̆m kơplah oei hơrih, ƀok Tổng Bí thư Nguyễn Phú Trọng tơrĕk kăp gĭt truh tơdrong jang vei răk tơƀăk mong rim kơjă joh ayŏ kon pơlei, kơjă joh ayŏ mŭk drăm kơ rim tơring kơ kon pơlei kông, tơguăt hăm chih akŏm tơdrong hơƀăp lơ̆m joh ayŏ kơ chăl hơrih păng hơpơi ‘meh khul hŏk kơjung, bơngai jang joh ayŏ gơh hơgei, jang tơnăp atŭm pơjing keh kong minh tơdrong joh ayŏ Việt Nam gơh hơgei, ƀenh kơ um ai kon pơlei kơdih. Tơ̆ Hop akŏm Joh ayŏ jơ̆p teh đak sơnăm 2021, Ƀok Tổng Bí thư lơ ‘măng ră hơdah: “Joh ayŏ noh pơhngol dơnơm kơ kon pơlei, tơbang um ai kăp gĭt kơ kon pơlei. Joh ayŏ oei noh kon pơlei oei...”

Băt hơdah tơdrong mă noh, ‘nhŏng Thạch Sroh tơ̆ xah Đôn Châu, apŭng Duyên Hải, dêh char Trà Vinh, jing bơngai jang lơ̆m Jơnŭm Văn hŏk Ngê̆ thươ̆t dêh char ăn tơbăt, khul ngê̆ sih Khmer khei năr âu ki hlôi đei lơ tơgop lơ̆m tơdrong vei răk tơƀăk mong joh ayŏ kră sơ̆ kơ kon pơlei. Kơdih po ‘nhŏng, khei năr truh gô pơtoi plang ăn tơdrong jang joh ayŏ. Gah tơdrong mă Ƀok Tổng Bí thư Nguyễn Phú Trọng lôch hiong, ‘nhŏng Thạch Sroh ƀrơ̆k lơ̆m đon bơnôh: “Ƀok Tổng Bí Thư Nguyễn Phú Trọng noh tôch hơgei, ƀok tơrĕk kăp gĭt gah joh ayŏ kơ kon pơlei Việt Nam pơma hơtŭm, mă kăl noh tơrĕk hơlêm kon pơlei kon kông vei răk tơƀăk mong um ai joh ayŏ kơdih kơ kon pơlei po. Dang ei, kơtơ̆ng ƀok Tổng Bí thư hiong, inh păng kon pơlei Khmer ơh sơ-‘ngon, apinh gơh chĕp vei đon bơnôh dơnưp mă Ƀok hlôi plang tih tên hăm kon pơlei”.

Ngê̆ nhơ̆n ưu tŭ Lâm Xuân tơ̆ xah Tân Mỹ, apŭng Trà Ôn, dêh char Vĩnh Long akhan, ƀok klưh yom gah trong pơm jang đơ̆ng Ƀok Tổng Bí thư Nguyễn Phú Trọng, kơtang lơ̆m tơdrong pơm jang mă lei dơnưp tơguăt tơjê̆. Mă kăl, Ƀok Tổng Bí thư Nguyễn Phú Trọng tơrĕk kăp gĭt truh tơdrong jang joh ayŏ, pơjing, vei răk dôm kơjă ‘lơ̆ng rŏ kơ joh ayŏ, kon bơngai Việt Nam. Ƀok Tổng Bí thư lôch hiong, noh teh đak hiong hê̆ minh bơngai hơgei, Đảng hiong minh đảng viên, minh kan ƀô̆ dăp đon dăp bơnôh pơm jang kơyuơ teh đak, kơyuơ kon pơlei. Ngê̆ nhơ̆n ưu tŭ Lâm Xuân ăn tơbăt dơ̆ng:  “Ƀok Tổng Bí thư đei đon bơnôh dơnưp, ‘mêm kơ-eng kơ kon pơlei kon kông, lơ̆m noh đei kon pơlei Khmer. Ƀok hơnơ̆ng tơrĕk tơnăp gah tơdrong vei răk tơƀăk mong joh ayŏ kon pơlei, ưh đei lê̆ hiơt hiong. Kơdih po inh akŏm jơhngơ̆m kơ-ŭ ơh ‘mêm ƀlŏk hơdơ̆r păng hmach bơnê kơ Ƀok Tổng Bí thư”.

 Oei ƀok Thạch Si Phone, sơ̆ jang Kơdră Khul Joh ayŏ Kơdŏ suang Khmer Bạc Liêu ăn tơbăt, jing bơngai jang gah tơdrong joh ayŏ, inh tơgĭt pôk bơnê kơ tơdrong dăp đon dăp bơnôh đơ̆ng Ƀok Tổng Bí thư Nguyễn Phú Trọng hăm joh ayŏ kon pơlei, pơm trong hiôk ăn rim bơngai jang joh ayŏ chă hơtŏk tơdrong hơgei, tơgop lơ hloh dơ̆ng ăn tơdrong joh ayŏ kơ teh đak. Ƀok Thạch Si Phone ơh sơ-‘ngon tơroi:  “Ƀok Tổng Bí thư Nguyễn Phú Trọng jing bơngai đei đon ‘lơ̆ng. Ƀok dăp đon dăp bơnôh hăm Đảng, hăm kon pơlei, lơ̆m noh đei kon pơlei kon kông păng hơnơ̆ng tơbang lơ̆m dôm Hop akŏm kơ Đảng tơdrong tơlĕch pơm kiơ̆ Tơchơ̆t gah tơdrong jang joh ayŏ. Dang ei ƀok lôch hiong, kơdih po inh ơh ‘mêm kơ ƀok. Hăm sơnong jang kơ minh ngê̆ sih, inh pơkăp khŏm mă jang kiơ̆ dôm tơdrong mă ƀok hơpơi ‘meh lơ̆m khei năr oei hơrih, noh tơrĕk akŏm pơm jang ăn tơdrong pơjing păng hơtŏk joh ayŏ juăt jue kơ kon pơlei Khmer”.

Tơdrong mă Ƀok Tổng Bí thư Nguyễn Phú Trọng lôch hiong jing minh tơdrong hiong tih tên hăm Đảng, Jơnŭm pơgơ̆r teh đak, kon pơlei bơ̆n, khul jang joh ayŏ jơ̆p teh đak pơma hơtŭm, bơngai jang joh ayŏ Khmer pơma hơdrô̆. Mă thoi noh, dôm tơdrong tơnăp dăp đon dăp bơnôh đơ̆ng Ƀok Tổng bí thư hăm joh ayŏ kon pơlei adoi oei tơ̆ noh, tôm đĭ đăng bơ̆n athei đei sơnong atŭm pơjing keh kong minh tơdrong joh ayŏ Việt Nam gơh hơgei, ƀenh kơ um ai joh ayŏ kon pơlei kiơ̆ tơdrong mă ƀok Tổng Bí thư hơpơi ‘meh jang đei.