Vă chĕp vei, tưk tơ iung tơ drong ‘lơ̆ng, kơ jă kăp gĭt đơ̆ng hơ băn ao tanh kơ dôm hơ drĕch kon kông tơ ring Tây Nguyên, lơ̆m 2 năr 29 păng 30/10, tơ̆ thĭ trơ̆n Măng Đen, apŭng Kon Plông, dêh char Kon Tum vă pơ gơ̆r Tơ drong jŏh hơ ri, hrŏk pơ rŏ ao tai păng hơ băn ao tanh Tây Nguyên yoa Dơ nŏ anih vei lăng kon pơ lei apŭng Kon Plông jang hơ doi hăm bơ ngai juăt chơ choh hơ băn ao Minh Hạnh pơ gơ̆r.

Tơ drong hrŭk pơ rŏ ao tai păng hơ băn ao tanh Tây Nguyên gô đei pơ gơ̆r tơ̆ 2 anih ‘nŏh chơ kơi Pa Sỹ păng kơ tă lơ̆m bri ‘long hơ ngo tơ ter trong Hùng Vương, thĭ trơ̆n Măng Đen, apŭng Kon Plông, dêh char Kon Tum. Vang hrŭk pơ rŏ hơ băn ao đei 100 ‘nu bơ ngai kon kông păng 40 ‘nu bơ ngai juăt jŏh hơ ri hơ xoang, hrŭk pơ rŏ hơ băn ao.

Mĭnh ƀar blăh hơ băn ao vă hrŭk pơ rŏ lơ̆m tơ drong pơ gơ̆r hrŭk pơ rŏ ao tai păng hơ băn ao tanh Tây Nguyên

Đĭ đăng 200 blăh ao tai, hơ băn ao tanh hăm brai Bảo Lộc tanh lơ kơ loăi tôch hơ iă, lăp hăm hơ băn ao chăl ‘nao yoa bơ ngai juăt chơ chŏh hơ băn ao Minh Hạnh kŭm hăm đe boăl sư pơ gơ̆r. ‘Nâu jĭ 1 lơ̆m lơ tơ drong jang vă tơ băt 110 sơ năm pơ jing dêh char Kon Tum (9/2/1913- 9/2/2023) hăm đon hơ pơi ‘mĕh hơ nhăk ba tơ drong ‘lơ̆ng ‘nao ăn che, khăn, hơ băn ao tanh, atŏk tơ iung tơ drong tanh brai vai khăn.