Hăm hơnăn “Tơgĭt khôi luơ̆t vă pơjing tơdrong juăt vei xơđơ̆ng trong nơnăm” 'năr akŏm hlôi hơvơn 300 đoan viên hơdruh tơdăm truh akŏm.

Tơ̆ âu, rim đoan viên hơdruh tơdăm đei akŏm dôm tơdrong nhen: Pơlong tơl nơ̆r apinh đei tơrĕk truh luơ̆t vei xơđơ̆ng trong nơnăm, tơmơ̆ng bơngai pơtho găh vei xơđơ̆ng trong nơnăm tơroi găh dôm tơdrong kăl băt lơ̆m vih vơ̆t kiơ̆ trong nơnăm nhen: hơlen lăng trong nơnăm mă tơnăp adrol kơ yak, tơdrong yơ̆l môk bao hiêm mă trŏ, vơ̆r gre xơđơ̆ng. Năr akŏm “Hơdruh tơdăm Gia Lai hăm tơnăp vih vơ̆t kiơ̆ trong nơnăm” xơnăm 2023 vă hơtŏk pran tơroi tơbăt, pơtho đe hơdruh tơdăm đoan viên găh vei xơđơ̆ng trong nơnăm; hơtŏk hlôh vao pơm kiơ̆ ƀlep Luơ̆t trong nơnăm, tơgop tơjur dôm tơdrong pơm glăi păng xar bar trong nơnăm.