Hăm hơnăn“Akŏm lơ tơdrong oei sa joh ayŏ”, Năr lêh joh ayŏ kơdŏ soang rim hơdrung dêh char Dak Lăk sơnăm au pơgơ̆r đơ̆ng năr 18-20/11. ‘Măng mă blŭng đei pơgơ̆r lơ̆m dêh char hăm 10 tơdrong pơgơ̆r tơm păng 2 tơdrong pơgơ̆r kiơ̆ yok rok jơ̆ng đơ̆ng rŏng, năr lêh hơvơn đei 800 ‘nu kon pơlei joh hơri đơ̆ng 15 apŭng, thi xah, pơlei tơm kơ dêh char Dak Lăk vang năm.

Lơ̆m au, Tơdrong pơgơ̆r blŭng a hăm lơ khul jŏh ayŏ kơdŏ soang ‘lơ̆ng rŏ, akŏm mơ̆t lĕch tơdrong joh ayŏ sơ̆ ki hăm tơdrong joh ayŏ hle pơm ăn tơdrong tơgoăt tơgoăl dih băl rim hơdrung. Tơdrong pơlong tôn chĭng chêng, joh hơri ‘lơ̆ng rŏ hơbo nhen sơ̆ ki. Tơ̆ pơm lêh pơtôch, khul chĕp pơgơ̆r hlôi pôk ăn hla bơar drơ̆ng nơ̆r ăn rim khul iŏk đei jơnei kơtang lơ̆m rim tơdrong pơgơ̆r; pôk ăn hla bơar hôn bơnê ăn 20 khul joh hơri ‘lơ̆ng hơ iă hloh lơ̆m tơdrong pơgơ̆r păng vang năm Năr joh ayŏ kơdŏ soang rim hơdrung dêh char Dak Lăk sơnăm 2023.