Hăm tơdrong tơm pôk pơ ư tơdrong oei sa joh ayŏ joăt joe ‘lơ̆ng rŏ kơ rim hơdrung Tây Nguyên, tơƀôh tơbăt, pơtrŭt hơvơn tơmang pơhiơ̆, Năr lêh Joh ayŏ, Đă ƀŏng lŏng tơplong kơdau păng Tơmang pơhiơ̆ rim hơdrung kon kông tơring Tây Nguyên ‘măng mă 1 sơnăm 2023 đei pơgơ̆r lơ̆m 3 năr, đơ̆ng năr 29/11 truh năr 1/12 tơ̆ pơlei tơm Kon Tum, dêh char Kon Tum, đei dang 1.000 ‘nu bơngai joh hơri rim hơdrung tŏk bŏk hơrih sa lơ̆m 5 dêh char Tây Nguyên.

Hăm hơnăn “Glơch glach Tây Nguyên- Akŏm Tơdrong ‘lơ̆ng rŏ”, Năr lêh Joh ayŏ, Đă ƀŏng lŏng tơplong kơdau păng Tơmang pơhiơ̆ rim hơdrung kon kông tơring Tây Nguyên ‘măng mă 1 sơnăm 2023 đei pơgơ̆r lơ tơdrong ‘lơ̆ng rŏ. Atŭm hăm Pơm lêh, găh tơdrong pơchơt đei pơgơ̆r rim tơdrong Joh ayŏ, Đă ƀŏng lŏng tơplong kơdau păng Tơmang pơhiơ̆.