Năr thơ Việt Nam ‘măng mă 22 tơ̆ Đắk Lắk hơnhăk ăn kon pơlei lơ ƀai thơ kăp gĭt lơ̆m tơdrong chih pơcheh thơ kơ 54 hơdrĕch hơdrung ‘nhŏng oh păng dôm ƀai chih ‘lơ̆ng hơiă găh cham char bri brăh, tơring teh, kon bơngai Đắk Lắk. Năr thơ Việt Nam tơ̆ Đắk Lắk tơƀôh hơdăh dôm tơdrong tôch hơiă kiơ̆ hơnăn đơ̆ng Năr thơ ‘nŏh jĭ tơdrong mât 1 ƀơ̆r đon đơ̆ng rim hơdrĕch hơdrung.

Lơ̆m năr pơgơ̆r oei đei hloi tơdrong ming pơdă, roi tơbăt dôm ƀai thơ đơ̆ng dôm bơngai chih lơ̆m păng ‘ngoăih kơ dêh char; tơguăt bơngai chih hăm bơngai ‘mĕh đŏk ngôi, bơngai hưch ‘mêm tơdrong chih pơđơ̆k; Pơdă um rup, mul meo, pơdă kơsơ̆p hla ar... Ƀlep ƀât ‘măng mă âu, Khul chih pơđơ̆k Đắk Lắk tơlĕch tơdrong chih pơcheh, roi tơƀôh dôm ƀai chih hơiă vă tơbăt 120 sơnăm pơjing dêh char Đắk Lắk.