Hăm tơdrong nhan lăp đơ̆ng oei ‘lâ̆p, jê̆ 50 sơnăm kơ âu ngê̆ nhơ̆n Kpă Huăt hăt hot pơm jang, atŭm hăm tơdrong hơgei kăp gĭt, ƀok hlôi pơm ăn dôm tơm ‘long tơngơ̆l jing hê̆ mul meo ‘lơ̆ng ƀenh kơ um ai joh ayŏ kơ bơngai Jarai. Ngê̆ nhơ̆n Kpă Huăt tơroi, vă chrah đei mul meo đơ̆ng ‘long hơrăng noh ưh kơsĭ rim bơngai gơh pơm ôh, mă đơ̆ng kơdih chă hơlen pơhrăm, chơ̆n jơhngơ̆m păng tơdrong hơbĕch. ‘Nâu jing minh tơdrong jang ưh đei bơngai pơtho mă đei jơnei đơ̆ng tơdrong hơbal kơ măt lăng hơlen ƀok mih ma chă chrah, bŏk mul păng đon lui kơ rim bơngai hăm mul mao.

Ngê̆ nhơ̆n Kpă Huăt tơroi: “Lơ̆m kơplah inh chrah mul meo, inh tơchĕng truh um ai mă inh gô pơjing. Ưh đe bơngai yơ pơtho mă lei kơyuơ tơdrong lăp, tơdrong sơ̆n chrah đei mul meo mă kơdih lăp. ‘Nâu jing tơdrong ‘lơ̆ng juăt jue kơ hơdrung hơdrĕch kơdih. Sơ̆ ki, kon pơlei hơnơ̆ng chrah mul meo vă ‘măn ah pơsat”

Ngê̆ nhơ̆n Kpă Huăt hlôi chrah lơ mul meo pơsat. Ah lăng hăm rim mul meo đei chrah pơjing, rim bơngai adoi băt hơdah đon lăp hăm tơdrong chrah mul meo kră sơ̆ kơ hơdrung kon kông kơdih. Tơpang ti kơchăng hăm rim trong chrah pơjing mul drăkăn hơdrom ƀŏ hmoi kơ klo, ngê̆ nhơ̆n Kpă Huăt tơroi, dôm mul meo âu tơƀôh đei đon bơnôh kơ bơngai oei hơrih hăm bơngai hlôi lôch. Noh jing đon bơnôh kăp gĭt păng tơguăt hăm tơdrong hơrih rim năr kơ bơngai hlôi lôch ah oei hơrih: “ ‘Măng chrah mul adrol kơ năm akŏm chrah mul meo ‘măn tơ̆ pơsat, mul meo bơngai drăkăn hơdrom ƀŏ hmoi kơ klo lôch hơchăng lơ̆m et brư̆, đei chrah hăm ‘long kơchĭk. Lơ ‘măng akŏm lơ̆m dôm thĭ trâ̆n inh adoi chrah mul meo bơngai drăkăn kuăr kon. Lơ bơngai lăp kơ mul meo inh chrah đei. Inh ưh đei chrah mul meo tĕch ôh mă chrah mul mao vă kon mon kon sau gơh ƀôh băt kơlih dang ei hŭi đei bơngai gơh chă chrah mul meo”

Ah kơleng năng tơ̆ mul meo ‘lơ̆ng, bu bu adoi hmach bơnê kơ tơdrong hơgei đơ̆ng ngê̆ nhơ̆n. Lơ̆m pơlei bơngai yơ kăl mul meo noh ƀok chrah ăn đĕch ưhd dei iŏk jên ôh, vă kon pơlei pơ-ư pơ-ang gah tơdrong juăt ‘lơ̆ng kơ hơdrung hơdrĕch kon kông, kon sau ƀôh, hŏk ƀoi vă vei răk tơƀăk mong. Vă tơdrong jang chrah mul meo đei vei răk, ƀok ưh hơdrô̆ pơtho ăn kon mon kon sau lơ̆m hnam, mă oei akŏm pơtho ăn rim bơngai ayơ ‘meh hŏk hơlen. Tơchĕng gah tơdrong pơtho pơdjoi, vei răk chrah mul meo, ngê̆ nhơ̆n Kpă Huăt pơngơ̆t kơ đon: “Dang ei adoi đei dôm bơngai mơlôh lơ̆m pơlei adoi hŏk ƀoi tơdrong jang chrah mul meo, ning mônh kơnh inh vih hăm yă ƀok bơih noh kon sau oei băt truh tơdrong jang mă yă ƀok pơsư̆ ăn. Kon mon kon sau đơ̆ng pơlei nai truh pơhrăm inh adoi pơtho mơ̆n. Gah tơdrong pơtho noh kăl jơnŭm pơgơ̆r tơring asong jên mă trŏ ƀlep. Inh tơchĕng hơnơ̆ng vă pơtho ăn kon sau gơh chrah mul meo. Mưh ba ưh đei pơtho noh kon sau ưh kơ băt ôh. Inh athei pơtho ăn kon sau khŏm mă gơh chrah mul meo”

Atŭm hăm khei năr dăr sơnăm păng tơdrong tơplih kơ tơpôl hơrih xa, pă gan đei bơngai tơrĕk truh chrah mul meo. Vă tơdrong chrah mul meo gơh đei vei răk tơƀăk mong ling lang noh kăl đei tơdrong tơgŭm jơhngơ̆m đơ̆ng dôm bơngai mơlôh lăp ‘mêm kơ tơdrong ‘lơ̆ng mul meo. Păng rim ngê̆ nhơ̆n đei tơpang ti hơgei, đei đon tơchĕng rơbeh rơbai nhen Kpă Huăt hơnơ̆ng kơchăng yak hadoi vă tơdrong jang chrah mul meo kơ kon pơlei Jarai gơh răk vei ling lang.