- Hmach kơ ih ngê̆ nhơ̆n ưu tŭ Alíp! Sô̆ hơ-iă đei pơma dơnuh hăm ih lơ̆m tơdrong tơroi Tơdrong juăt ‘lơ̆ng kră sơ̆ kơ kon pơlei kon kông Tây Nguyên ‘năr âu. Ngê̆ nhơ̆n ăi, chĭng chêng noh hăp kăp gĭt thoi yơ lơ̆m tơdrong hơrih kon Bahnar bơ̆n?

-Ngê̆ nhơ̆n Alip: “Hơdrol noh inh pơtruh nơ̆r hmach bơnê hăm mih ma duch nă mơ̆ng brŏ,,, Ching chêng kăp gĭt tơpă lơ̆m tơdrong hơrih đơ̆ng kră sơ̆. Tơdrong kăp gĭt hăp noh đei yua lơ̆m dôm tơdrong akŏm tih gĭt, groong bơngai lôch, et soi nhen et xa kơpô, et soi aseh... adoi yua chĭng chêng. Sơ̆ ki noh, đe hnam pơdrŏng noh mă đei chĭng chêng, răt minh hơmrŭk chĭng chêng athei tơplih hăm dôm tŏ kơpôl, rơmo... Chĭng chêng đei yua ăn pơlei pơla, noh tơdrong hăp akŏm tơdrong kăp gĭt gah mŭk drăm păng đon bơnôh hloi”.

- Hơbŏ ih hlôh vao kloh klĕch gah kơjă kăp gĭt kơ chĭng chêng, noh hlôi tơguăt hăm chĭng chêng đơ̆ng oei ‘lơ̆p păng hlôi jing tơdrong lăp tơklep lơ̆m tơdrong hơrih kơdih po?

-Ngê̆ nhơ̆n Alíp: “Chĭng chêng hlôi kiơ̆ inh đơ̆ng oei ‘lơ̆p, jơva chĭng chêng pơm ăn kơ inh ƀlŏk truh dôm tơdrong et xa juăt jue nhen brư̆... Kơdih po inh gơnơmd dei hŏk hơlen đơ̆ng mih ma kơdih noh gơh pơdreh chĭng chêng, inh hơnơ̆ng kiơ̆ đe sư năm pơdreh chĭng chêng lơ̆m dôm năr et xa, tơdrong et xa ayơ adoi yua chĭng chêng noh adoi năm kiơ̆ ngăl..

- Thoi ăi, kiơ̆ đơ̆ng tơdrong et xa, ih hlôi pơhrăm pơdreh chĭng chêng păng hram lơ̆m dôm tơdra brông brŏng. Ih tơroi lăng gah tơdrong mă âu thoi yơ?

-Ngê̆ nhơ̆n Alíp: “Lơ̆m ‘măng akŏm et xa, kơtơ̆ng jơva chĭng chêng noh rim bơngai luh năm, atŭm pơdreh, hơsuang sô̆ hơ-iă dêh, mă kăl lơ̆m khei brư̆ oh sô̆ hloh.. athei gô truh tong hơnê̆ măng pơtơm truh ah po pơhrăm tôn. Pơtơm kơmăng noh dôm bơngai tôn chĭng hơgei pơdreh hơdrol, kơlih jơ âu đe hơđruh oei hơsuang, đe tơdăm ‘meh tơƀôh tơdrong hơgei po noh jơ âu ‘meh pơhrăm ưh gơh ôh, gô truh tong hơnê̆ măng, lơ bơngai et soai bơih pă kĕ pơdreh chĭng chêng bơih, ƀơ̆t noh pơtơm đei bơngai pơtho ăn ba pơhrăm. Mă 2 noh ah ưh kơ mah bơngai tôn noh ba apinh mơ̆t pơtăl, pơdreh đơ̆ng kơluăi chêng iĕ, tôn dôm ƀai chêng ƀônh, đunh kơ noh pơdreh chêng tih, ƀai chêng tơnap truh ah kloh klĕch nhen dang ei”

- Ĭ ah, hăm tơdrong lăp păng pơnam hŏk hơlen lơ̆m dôm jĭt sơnăm kơ âu, hơbŏ ih adoi akŏm đei lơ “tơdrong gơh” lơ̆m joh ayŏ chĭng chêng?

-Ngê̆ nhơ̆n Alíp: “Kơdih po inh gơh pơdreh đei lơ ƀai chêng, jô̆ hloi ƀai chêng so sơ̆ dah mă ƀai chêng ‘nao hrei âu. Pơtih nhen lơ̆m khei et xa, brư̆ noh dôm ƀai chêng đei tơdra sô̆ hơ-iă, oei lơ̆m et xa kơpô, rơmo noh pơdreh dôm ƀai chêng nai. Et xa kơpô noh đei hloi chĭng păng chêng, oei et xa rơmo, aseh noh pơdreh chĭng đĕch (chêng đei klŏk). Ƀai chêng et xa kơpô vă nhen ƀai chêng et tŏk rông ‘nao. Lăng hơtŭm ƀai chêng so adoi đei lơ, oei ƀai chêng ‘nao dang ei noh đe krao ƀai chêng Jrai, đei lơ tơdra hiôk truh dôm jĭt ƀai hloi”.

- Mưh vă dôm ƀai chêng âu ưh đei hiơt hiong, ih đei trong jang mă yơ vă pơtho ăn kôn mon kon sou kơdih ưh?

-Ngê̆ nhơ̆n Alíp: “Inh pơtho tôn chĭng chêng đei 11, 12 sơnăm kơ âu bơih. Đe mon chă akŏm pơhrăm đei asong hla bar pơkăp ngê̆ nhơ̆n mơlôh lơ̆m pơlei pơhlom 40 ‘nu mon. Danng ei đe mon lăp chă akŏm dôm tơdrong et xa, akŏm joh ayŏ. Inh hơnơ̆ng hơpơi đe kôn mon kon sou ling lang vei răk dôm ƀai chêng kăp gĭt mă mih ma pơsư̆ ăn noh inh hơdrin pơtho ăn đe sư dôm ƀai chêng mă hơdah jô̆ hloi chĭng klơk, dah mă Ting ning...”

- Ĭ ah, bơnê kơ ih ngê̆ nhơ̆n Alip hlôi asong jơ akŏm pơma dơnuh âu.