Mih ma duch nă păng bôl boăl ‘nao mơ̆ng bơih ƀơ̆r hơri ngê̆ nhơ̆n Rơ Ô Bhung. Ƀok tơroi, tơdra hơri Jarai hiôk dêh, ‘lơ̆ng dêh păng ưh gơh kơƀah lơ̆m tơdrong hơrih pơlei pơla, mă kăl noh lơ̆m tơdrong et xa. Ngê̆ nhơ̆n Rơ Ô Bhung băt hơri tơdra kră sơ̆ đơ̆ng oei ‘lơ̆p. Atŭm hăm noh, ƀok oei chă hơlen băt pơdreh goong đơ̆ng đe mih ma lơ̆m pơlei. Ƀok oei băt kloh klĕch gah tơdra chĭng chêng kră sơ̆ kơ bơngai Jarai. Rim ‘măng pơlei pơgơ̆r et xa dah mă pơgơ̆r soi tơbeh lơ̆m pơlei pơla ưh gơh kơƀah minh ngê̆ nhơ̆n gơh hơgei nhen ƀok.

Hăm tơdrong hrơ hrau đơ̆ng tơpôl ‘nao dang ei, ngê̆ nhơ̆n Rơ Ô Bhung tơroi, hơdrô̆ hŏk pơhrăm noh đe mơlôh pơtơm băt hơdah gah kơjă joh ayŏ kơ hơdrung hơdrĕch po. Hơdrol kơ đei tơdrong hlôh vao, đe mơlôh gô tơgĭt hloh tơdrong ‘lơ̆ng rŏ joh ayŏ kơ hơdrung hơdrĕch po. Kơyuơ noh lơ̆m ‘măng akŏm tôm kon pơlei, ngê̆ nhơ̆n Rơ Ô Bhung tơgenh tơtă ăn kon mon kon sau athei hơdrin hŏk pơhrăm truh tơm truh tôch: “Bơngai Jarai nhôn hơnơ̆ng tơtă ăn kon mon kon sau pơ-‘nam hŏk pơhrăm truh tơm truh tôch, pơtho kon mon kon sau ưh đei oei klo hơkăn đơ̆ng hrôih, mă dang ei tơdrong hơrih tơnap tap, mĕ ƀă hrat hrĭn ră mă lei adoi oei hơdrin ăn kon hơ-ioh năm hŏk tơnăp vă ning nai kơnh gơh pơvih ăn tơdrong hơrih kơdih po păng tơgŭm ăn mĕ ƀă”.

Kiơ̆ ngê̆ nhơ̆n Rơ Ô Bhung, minh tơdrong kăp gĭt păng kăl hloh dang ei hăm ƀok noh pơtho đe kon mon băt đŏk chư, băt chih nơ̆r Jarai. Ah mă đe hơ-ioh băt chih chư bơih noh gô pơtho hơri tơdrong hơri Jarai. Ƀok hơnơ̆ng ‘măn ah kơsơ̆ lơ̆m giĕng atŭm hăm đe boăl mơlôh hŏk chư, hŏk nơ̆r pơma, pơdjoi tơdrong nhan lăp ăn đe hơ-ioh. Rim ‘măng pơlei pơla đei akŏm et xa, lăng đe hơ-ioh hrơ hrau lơ̆m tơdra hơri hiôk ‘lơ̆ng, hơsuang kiơ̆ tơdra chĭng chêng noh mah vơch kơ jơhngơ̆m. Noh adoi jing minh tơdrong pơtrŭt ƀok pơtoi hăm tơdrong pơtho pơdreh chĭng chêng, hơri tơdra kră sơ̆, pơtho nơ̆r Jarai ăn pơlei pơla. Ngê̆ nhơ̆n Rơ Ô Bhung ăn tơbăt: “Kơdih inh hơnơ̆ng pơtho nơ̆r Jarai ăn kon mon kon sau ah kơsơ̆, păng pơtoi kơ noh pơtho ăn đe mon dôm ƀai hơri kon kông po vă akŏm tơdrong lăp, hli ning nai kơnh hiơt hiong kơlih nhôn adoi ‘lŏ kră bơih, minh pah noh adoi vă đe mon gơh đei năm akŏm pơdah joh ayŏ nhen năm akŏm ‘năr pơdah chĭng chêng, hơri hơ-‘ngươ̆u kơ Đảng păng teh đak, nhen nơ̆r Ƀok Hô hơvơn tôm kon pơlei vei lăng teh đak, hơvơn kon pơlei pơm jang, tơgŭm kăch mang, kơhret tơdrong tơguăt tơguăl lơ̆m rim pơlei pơla”.

Ngê̆ nhơ̆n Rơ Ô Bhung tơroi, sơ̆ lơ̆m pơlei lơ unh hnam đei chĭng chêng, gŏ ge, dang ei oei pă tŏ sĕt bơngai đĕch vei răk păng duh oei tŏ sĕt bơngai đĕch gơh chă pơdreh chĭng chêng. Tơdrong hơrih ‘nao hăm lơ tơdra hơri phara dih băl, tơdrong pơtho hơri tơdra kră sơ̆ adoi ƀơm lơ tơnap tap hloh. Sơ-‘ngon hloh ‘noh, lơ bơngai mơlôh Jarai tơ̆ lơ tơring ưh kơ băt chă đŏk, chă chih nơ̆r pơma kon kông po kơdih. Kơyuơ noh, rim ‘măng ƀôh đei đe hơ-ioh pơ-‘nam hŏk nơ̆r Jarrai, pơhrăm pơdreh chĭng chêng, noh jing tơdrong sô̆ hơ-iă tih hloh hăm đe ngê̆ nhơ̆n nhen ƀok: “Đei minh tơdrong hĕl kơ đon ‘noh chăl kon mon kon sau dang ei đei lơ bơngai ưh kơ băt chih chư, pơma nơ̆r Jarai, mă lei đei tơdrong tơgŭm đơ̆ng jơnŭm pơgơ̆r tơring, dang ei kon pơlei hlôi băt vei răk tơƀăk mong joh ayŏ juăt jue đơ̆ng pơdreh chĭng chêng, hơri tơdra kră sơ̆ păng dôm tơdrong hơ-‘mon, kơyuơ noh inh adoi sô̆ hơ-iă lơ̆m đon kơlih kon pơlei pơm kiơ̆ tơnăp”.

Mă sơnăm hlôi ‘lŏ mă lei Ngê̆ nhơ̆n Rơ Ô Bhung, tơ̆ pơlei Mlăh, xah Phú Cần, apŭng Krông Pa (dêh char Gia Lai) adoi oei hăt hot hăm tơdrong pơtho joh ayŏ chĭng chêng ăn đe mơlôh. Ƀok đei lăng jing “dơhnit unh pơchră đon bơnôh” ăn dôm tơdrong akŏm gah joh ayŏ, pơdreh chĭng chêng tơ̆ tơring. Hloh kơ ‘noh, Ngê̆ nhơ̆n Rơ Ô Bhung adoi jing bơngai pơtho nơ̆r pơma chư chih ăn bơngai Jarai tơ̆ tơring.