Đơ̆ng kră xơ̆, erih atŭm tơjê̆ hăm cham char plenh teh noh tơdrong hơ̆ tăng đei bơngai Êđê iŏk chă xa vă pơtrŏ hăm tơdrong đei ƀôh đơ̆ng cham char plenh teh. Djam ƀlê jing minh hơdrĕch ‘nhot juăt jue hăm bơngai Êđê, jing ‘nhot xa ‘lơ̆ng păng adoi jing minh kơluăi pơgang kăp gĭt.

Lơ̆m pơyan phang djam ƀlê hơnơ̆ng hon giơ̆ng jing uh un ăh joh bri, lơ̆m mir. Lơ̆m pơyan ‘mi noh djam ƀlê ưh đei ƀâu phu ‘lơ̆ng bơih. Vă pai ‘nhot xa đơ̆ng hơdrĕch hla ‘nhot bri, bơngai Êđê adrô̆ kơ-‘nĕk hla pơda vih ôp rơgoh păng pai pơjing kiơ̆ tơdrong lăp kơ rim bơngai. Djam ƀlê noh tăng ƀâu phu.

Pơmai H’Lip Kƀuôr, tơ̆ pơlei Yao, xăh Ea Tul, apŭng Čư̆ Mgar, dêh char Dak Lak ăn tơbăt,  djam ƀlê noh jing tơmam xa tơguăt tơjê̆ hăm bơngai Êđê: “Đơ̆ng rŏng kơ pĕ đang inh pơhang hăm unh, đang kơ noh rơih iŏk tơ-‘mơ̆ng pơda tăh lơ̆m xiĕr. Đang kơ noh peh hơmrĕ, ƀoh, ƀôk ngok, kơdĭm kông lŭk lơ̆k hăm djam ƀlê. Ăh pơyan âu, djam ƀlê  ưh gơh kơƀah lơ̆m ‘măng xŏng xa tơ̆ mir”

Bơngai Êđê hơnơ̆ng pai pơjing djam ƀlê kiơ̆ trong phara băl, xa hơdrih dăh mă ơ̆p, xao ‘nâu nai hia. Đe mơlôh noh hơnơ̆ng bơ̆ tanh hloh nhen lŭk lơ̆k hơdrih hăm đak măm, xao hăm ka hâ̆p, ka kro... Oei bơngai ‘lŏ xơnăm noh hơnơ̆ng pai pơjing lơ tơdrong hloh nhen pai tơpŭng, dăh mă tăh dôm tơmam xa ‘lơ̆ng adrô̆ bơngai Êđê đĕch đei vă pai ‘nhot djam blê. Yă H’Dluê Êban tơ̆ pơlei Hra B, xăh Ea Tul, apŭng Čư̆ Mgar, dêh char Dak Lak ăn tơbăt: “Ăh pai pơjing ‘nhot âu, pai đak tŏ, đang kơ noh tuh đak hơnuh xoh đơ̆ng hla prit dăh mă kơđoh tơh. Đơ̆ng rŏng kơ noh bơ̆n tăh ƀoh ƀôk ngok âu to. Ăh kơdơ̆k noh tăh hla djam ƀlê, tăh tŏ xĕt ƀum krĕm hơdrĕng, tăh kơdĭm kông. Đơ̆ng kră xơ̆, bơngai Êđê hlôi băt xa ‘nhot âu, găh pai kiơ̆ trong âu noh ưh gan đei lơ bơngai pai. Lơ bơngai xa hơdrih dăh mă xao”

Oei hăm pơmai H’Zen Ayun, tơ̆ pơlei Pơr, xăh Ea Tul, apŭng Čư̆ Mgar, dêh char Dak Lak noh hơnơ̆ng pai djam ƀlê hăm hmôch iŭ păng tăh dôm tơmam drăm hơnơ̆ng kơ yua pai xa rim năr vă ‘nhot xa gơh ‘lơ̆ng hloh. Pơmai tơroi, dôm ‘nhot xa đơ̆ng djam ƀlê âu ưh adrô̆ pơ-‘lơ̆ng ‘măng xŏng xa ăn unh hnam, mă oei jing minh lơ̆m dôm ‘nhot xa kăp gĭt đei pai jong ăn tơmoi kơ pơlei pơla: “Inh pai djam blê hăm pro preng găr iĕ, hmôch iŭ, tăh ƀoh, ƀôk ngok, hơmrĕ lơ dăh mă tŏ xĕt kiơ̆ kơ bơngai xa. Djam ƀlê ‘lơ̆ng hloh ăh pơyan phang, ăh pơyan ‘mi adoi tăng mă lei ưh đei ƀâu phu. ‘Nhot xa âu tăng, ƀâu phu. ‘Nâu jing ‘nhot xa ‘lơ̆ng kăp gĭt kơ bơngai Êđê”.

Dang ei roi đei lơ bơngai lăp păng tơchă djam ƀlê vă chă pai pơjing ‘nhot xa rim năr kơlih âu jing hơdrĕch ‘nhot ‘lơ̆ng hăm jơhngơ̆m jăn. Mă pai thoi yơ noh djam ƀlê adoi oei tăng ‘lơ̆ng ƀenh kơ hơyuh bri kông. Bơngai Êđê lui ngeh, dôm bơngai lăp xa dôm hơdrĕch ‘nhot bri tăng jing dôm bơngai pran jăng, pơ-‘nam bơ̆ jang. Bơngai yơ đei xa ‘nhot tăng ƀâu phu âu minh ‘măng đĕch noh gô ưh kơ lai yơ hiơt ôh.