Mŏ Hán Thị Kim Sương tơ̆ plei Chăm Hậu Sanh, xăh Phước Hữu, apŭng Ninh Phước ƀôh tôch hơiă mưh ‘măng mă blŭng đei akŏm lơ̆m tơdrong pơtâp pơhrăm, chă akŏm, iŏk yoa tơmam jŏh ayŏ kơdŏ xoang Chăm vă jang tŏk kơjăp hăm tơdrong vang akŏm đơ̆ng tơpôl, yoa Anih jang kơ tĕh đak Anh jang hơdoi hăm Anih jŏh ayŏ kơ dŏ xoang Chăm Ninh Thuận pơgơ̆r. Lăm hŏk đei 35 ‘nu bơngai, truh đơ̆ng dôm pơlei pơm ƀô̆i Bàu Trúc, plei tanh brai vai khăn Mỹ Nghiệp păng dôm tơring đei kơthap Chăm sơ̆.

Mŏ Hán Thị Kim Sương tơroi: “Khei ‘năr âu ki, ƀât đei pơtâp pơhrăm oh ƀôh tôch đei yoa vă ba hlôh vao găh trong jang atŏk tơiung chă tơmang lăng tơpôl ‘moi kiơ̆ đơ̆ng tơdrong jŏh ayŏ kơ dŏ xoang Chăm nhôn. Tơ̆ plei nhôn đei kơthap Pôrôme, yoa thoi nŏh, kơdih kâu inh kŭm chă roi tơbăt vă tơmoi truh lăng ngôi kơthap Pôrôme. Vă tơmoi băt, lăng ƀôh găh tơdrong atŏk tơiung chă tơmang lăng tơ̆ dêh char nhôn."

Hăm lơ kơthap Chăm oei ‘lơ̆ng thoi sơ̆, kŭm hăm dôm tơdrong lêh so đei pơgơ̆r rim sơnăm păng dôm pơlei đei tơdrong jang so nhen plei tanh brai Mỹ Nghiệp, plei pơm bô̆i Bàu Trúc, tơdăh đei iŏk yoa ‘lơ̆ng gô jing anih truh tôch hơiă, vă dêh char Ninh Thuận iŏk yoa pơđĭ dôm tơmam jŏh ayŏ Chăm pơyoa ăn tơdrong jang atŏk tơiung chă tơmang lăng. Găh tơdrong vă atŏk tơiung chă tơmang lăng lơ̆m tơpôl đei yoa ‘lơ̆ng, mŏ Phạm Thu Nga, jang tơ̆ Anih jang Anh tơroi: “Kŭm hăm tơdrong vang jang đơ̆ng tơpôl, nhôn lui tơring hơnơ̆ng iŏk yoa đei kơjă kăp gĭt đơ̆ng sơ̆ kŭm nhen tơlĕch đei lơ tơdrong jang vă chĕp vei, tưk tơiung kơjă kăp gĭt đơ̆ng jŏh ayŏ kơ dŏ xoang hai, vă tơgŭm ăn tơpôl tơ̆ tơring jang atŏk tơiung mŭk drăm ‘moi kiơ̆ tơdrong jŏh ayŏ kơ dŏ xoang tơ̆ tơring kơdih hai”.

Hrei ‘nâu dôm anih trung ngôi nhen plei pơm bô̆i Bàu Trúc, plei tanh brai Mỹ Nghiệp jô̆ păh lăp 1 năr đei hlŏh 300 ‘nu bơngai truh tơmang lăng. Hơdrô̆ kơthap Pô klong Girai, 1 sơnăm sơng dang 120 rơbâu ‘nu bơngai chă tơmang lăng. Tơ̆ plei pơm bô̆i Bàu Trúc, hơdai hăm pơm bô̆i kuay hăm kơƀang dăr ‘nŏh tơdrong kôch tĕh lân vă pơm bô̆i păng ki thuơ̆t ƀuh bô̆i kŭm tôch hơiă pơm ăn tơmoi tôch lăp đon. Mưh truh tơ̆ plei pơm bô̆i Bàu Trúc, đei lăng ƀôh tơdrong pơm bô̆i đơ̆ng đe ngê̆ nhơ̆n, tơmoi chă tơmang lăng jĭ bơngai tơgŭm roi tơƀôh tơmam bô̆i, pơnhan Chăm Bàu Trúc truh hăm rim tơring lơ̆m tĕh đak dơ̆ng.

‘Nhŏng Siu Hriêng 1 ‘nu tơmoi chă tơmang lăng đơ̆ng dêh char Gia Lai tơroi: “Lơ̆m khei ‘năr năm tơmang lăng tơ̆ pơlei pơm bô̆i Bàu Trúc, inh ƀôh đei lơ tơmam ‘nŏh jĭ tơdrong ‘lơ̆ng vă atŏk tơiung chă tơmang lăng lơ̆m tơpôl. 1 lơ̆m dôm tơmam tơm tih hlŏh ‘nŏh jĭ bô̆i Bàu Trúc. Mưh ƀô̆i Bàu Trúc đei Unesco chih tơbăt jĭ tơmam so kăp gĭt kơ apŭng plenh tĕh ‘nŏh ‘nâu jing tơmam tôch ‘lơ̆ng tơdăh tơpôl bơngai Chăm tơ̆ plei Bàu Trúc đei trong jang hơdoi hăm dôm tơpôl nai dăh mă đe bơngai ngê̆ nhơ̆n, tơmât hơdoi hăm tơdrong jŏh ayŏ kơdŏ xoang vă atŏk tơiung chă tơmang lăng kơ tơpôl Bàu Trúc”.

Đơ̆ng 2 sơnăm ‘nâu, tơ̆ plei pơm bô̆i Bàu Trúc hlôi pơjing Khul jang chă tơmang lăng tơpôl, hăm tôm grŭp jang nhen: Grŭp sơng tơmoi, grŭp pai tơmam xa, grŭp pơm bô̆i, grŭp hơri hơxoang… Gơnơm bơ̆ jang gơ̆h hơgei mă Khul chă tơmang lăng plei Bàu Trúc ưh lăp pơvih ăn tơmoi truh lăng tơ̆ pơlei đĕch mă khul oei iŏk đei nơ̆r krao năm hơri hơxoang, roi tơbăt bô̆i Chăm tơ̆ lơ tơring lơ̆m tĕh đak.

Mŏ Đàng Thị Ngọc Ngà, Kueng kơphô̆ Bàu Trúc, thĭ trơ̆n Phước Dân, apŭng Ninh Phước, Ninh Thuận tơroi: “Đơ̆ng năr Khul jang tơmang lăng kơ plei Bàu Trúc đei pơjing. Nhôn đei pơtho tơƀôh, pơtâp pơhrăm ăn đe ŏh jang chă tơmang lăng lơ̆m tơpôl. Pơm thoi yơ vă tơmoi chă tơmang lăng lăp đon, truh ngôi, chă hơlen năng tơdrong jŏh ayŏ kơdŏ xoang Chăm. Đơ̆ng nŏh, tơroi ăn tơmoi chă tơmang lăng lơ̆m păng ‘ngoăih kơ tĕh đak băt lơ ƀiơ̆ găh tơdrong jŏh ayŏ kơ dŏ xoang kơ bơngai Chăm.”

Iŏk yoa tơdrong jŏh ayŏ kơdŏ xoang vă atŏk tơiung chă tơmang lăng lơ̆m tơpôl tơ̆ dôm tơring kon pơlei Chăm Ninh Thuận hlôi pơjing đei lơ tơdrong jang păng pơm hơtŏk iŏk yoa ăn kon pơlei. Kŭm hăm dôm tơmam chă tơmang lăng hlôi đei dang ei tơ̆ Ninh Thuận, tơdrong tơmang lăng chă hơlen năng dôm tơdrong jŏh ayŏ kơdŏ xoang Chăm hlôi jing 1 păh, ưh gơ̆h tơplĕh hăm tơmoi chă tơmang lăng mưh truh hăm dêh char Ninh Thuận. Tơdrong jŏh ayŏ kơ dŏ xoang Chăm tơdăh băt trong iŏk yoa, ưh lăp tơgŭm pơm hơtŏk tơdrong chă tơmang lăng đĕch mă oei tơgŭm ăn dôm pơlei đei tơdrong jan so jang tŏk pran, tơgop vei kơjăp păng tưk tơiung dôm kơjă kăp gĭt đơ̆ng jŏh ayŏ kơdŏ xoang ‘lơ̆ng đơ̆ng sơ̆ lơ̆m chăl ‘nao hrei ‘nâu.