Gơmăng hei (21/4) tơ̆ Cham xă Hùng Vương, plt Việt Trì, dêh char Phú Thọ jang hơdoi hăm Anih tơm vei lăng jŏh ayŏ kơ dŏ xoang, tơplŏng kơdâu păng chă tơmang lăng pơm lêh Đền Hùng, Giĕng jŏh ayŏ kơ dŏ xoang – chă tơmang lăng tơ̆ groi tĕh yă ƀok tơm a lơ̆m sơnăm 2023; pơgơ̆r tơƀôh tơdrong jŏh hơri hơxoang gĭt kăl đei UNESCO chih hơgăt păng Tơbăt 20 sơnăm bơ̆ jang kiơ̆ Nơ̆r pơkăp 2003 đơ̆ng UNESCO”.

Pơma ƀât blŭng jơ pơm lêh, Phó Thủ tướng Trần Hồng Hà akhan, vei kơjăp, pơjing păng tưk tơiung kơjă kăp gĭt đơ̆ng jŏh ayŏ kơ dŏ xoang ‘lơ̆ng hơiă kơ hơdrĕch hơdrung ‘nŏh jĭ tơdrong tôch gĭt kăl, nhen Tổng Bí Thư Nguyễn Phú Trọng bou truh nơ̆r pơma đơ̆ng chăl adrol sơ̆ tơ̆ Hop akŏm Jŏh ayŏ kơdŏ xoang lơ̆m tĕh đak sơnăm 2021: “Jŏh ayŏ kơdŏ xoang oei đei ‘nŏh hơdrĕch hơdrung oei đei”.

Hăm 15 tơdrong jŏh ayŏ kơdŏ xoang so đei UNESCO chih hơgăt, Việt Nam jĭ 1 lơ̆m dôm tĕh đak đei tơdrong jŏh ayŏ kăp gĭt tơpôl lơ lơ̆m apŭng plenh tĕh.  Đơ̆ng rŏng kơ lêh pơih blŭng ‘nŏh đei pơgơ̆r tơdrong hơri hơxoang “Sĭt mơsêh groi tĕh tơm a-Tĕh ƀok pơtao Hùng”. Tơdrong jŏh hơri đei 3 jăl: Sĭt mơsêh groi tĕh tơm a- Tĕh ƀok Pơtao Hùng, ‘lơ̆ng hơiă tơmam jŏh ayŏ so păng Tơdrong hơpơi ‘mĕh Lạc Hồng.