Năr lêh đei hơ năn “Bạc Liêu tơgoăt ‘lơ̆ng hơiă tơmam so sơ̆ păng hơpơi ‘meh hơtŏk tơiung” đei hloi 14 tơdrong jang, đei tơdrong vang tơgop jơhngơ̆m đơ̆ng 25 dêh char, pơlei tơm lơ̆m teh đak. Tơdrong hơiă đơ̆ng Năr lêh ‘noh jĭ tơdrong hơdai kơjăp đơ̆ng joh ayŏ hăm tơmang lăng; pôk pơ ư tơdrong kăp gĭt ƀai hơri Dạ cổ hoài lang đơ̆ng nhap nhạc sĩ Cao Văn Lầu pơcheh đunh kơ âu hloh 100 sơnăm hai, vei răk păng lang să tơdrong Joh hơri Đờn ca tài tử Nam bộ hlôi đei UNESCO pôk hơnăn ‘noh tơdrong joh ayŏ kăp gĭt kơ kon bơngai hai.

Pơma tơ̆ lêh pơgơ̆r Năr akŏm, Phŏ Thủ tướng Vũ Đức Đam akhan: Năr joh ayŏ - tơmang lăng Bạc Liêu păng lêh Dạ cổ hoài lang sơnăm 2022 jĭ tơdrong jang hơdăh ‘lơ̆ng pơm kiơ̆ Pơtôch đơ̆ng ƀok Tổng Bí thư Nguyễn Phú Trọng tơ̆ Hop akŏm Joh ayŏ lơ̆m teh đak pơgơ̆r đunh kơ âu ƀlep 1 sơnăm, yak truh tơdrong tơm vei răk păng tơƀăk mong ‘lơ̆ng hloh tơdrong kăp gĭt joh ayŏ so sơ̆, pơjing tơdrong joh ayŏ ‘lơ̆ng hơiă hơdrĕch hơdrŭng.