Pơjing hơnih tơmang lăng tơpôl, kon pơlei plei Đăk Răng, xăh sơlam Đăk Dục, apŭng Ngọc Hồi, dêh char Kon Tum hlôi chĕp vei hơtŏk tơiung lơ tơmam ‘lơ̆ng hơiă kơ bơngai Gié- Triêng. Dang ei kŭm hăm khŭl tôn chĭng chêng, hơsoang, kon pơlei oei pơvei tơdrong jang pai tơdrô ge, tanh brai vai khăn, pơm dôm tơmam tôn reh; pơm dôm tơmam yua ăn jang sa, oei sa, tơmam lăng jơ̆ng ti; vei răk Rông ƀlep thoi kră sơ̆; pơvei dôm tơdrong et soi kiơ̆ jơhnơr arih kơ kon pơlei păng pơyan jang mir roh...

Hăm đon pơhnŏng hơtŏk tơdrong oei sa ‘lơ̆ng hơiă so, cham char bri brăh ‘lơ̆ng rŏ vă hơtŏk tơiung tơmang lăng, hăm tơdrong tơgŭm đơ̆ng khŭl kơdră tơring, plei Đăk Răng hlôi pơm lăp tôm dôm tơdrong hơgăt păng đei Anih vei lăng kon pơlei dêh char Kon Tum drơ̆ng ăn ‘noh jĭ Plei tơmang lăng tơpôl.