VOV4.Bahnar - Pơ gê ‘năr (6/6), Anih vei lăng găh joh ayŏ tơ plŏng kơ dâu dêh char Quảng Bình pơ gơ̆r pơ dă tơ ƀôh hla ar, rup hăm hơ năn “65 sơ năm Quảng Bình pơm kiơ̆ nơ̆r ƀok Hồ pơ tho” tơ̆ Anih ‘măn răk tơ mam drăm so akŏm kơ dêh char. Pơ dă tơ ƀôh vă jê̆ 1000 hlak rup, kơ sâp hla ar gĭt hơ năn “65 sơ năm Quảng Bình pơm kiơ̆ nơ̆r ƀok Hồ pơ tho”. Tơ drong tơm pơ dă tơ ƀôh găh tơ drong arih sa, tơ drong jang păng dôm kŏng jang tih tên đơ̆ng Kơ dră  Hồ Chí Minh hăm tơ drong jang kach mang đơ̆ng Đảng, đơ̆ng hơ drĕch hơ drŭng bơ̆n.

Pơ dă vă tơ gop pơ tho pơ hrăm đon tơ chĕng kach mang, tơ drong joăt joe ‘mêm kơ teh đak ăn jơ hnơr mơ lôh, tưk tơ iung jơ hngơ̆m chhôk ‘nă, lui yom hơ drĕch hơ drŭng; pơ trŭt rim răih kon pơ lei Quảng Bình bơ̆ jang păng plang jơ hngơ̆m pơ jing pơ lei pơ la roi ‘năr roi hơ gei, pơ drŏng ‘lơ̆ng rŏ.

Thuem: Tơ blơ̆