VOV4.Bahnar - Pơ gê 21/4, tơ̆ Anih ‘măn răk tơ drong tơ blăh Hồ Chí Minh, Anih jang chinh trĭ khul linh Quân khu 7 pơ gơ̆r pơ dă “Jơ hngâm pran đơ̆ng linh, kon pơ lei lơ̆m tơ drong tơ blăh Hồ Chí Minh păng tang găn jĭ, dŏng kon pơ lei”. ‘Măng pơ dă ming tơ ƀôh hlŏh 300 um rup, hla ar chih, tơ mam drăm đei dôm khul linh ƀô đô̆i bơ̆n iŏk yoa lơ̆m tơ drong Tơ blăh păng iung tơ jră pơ yan Phang 1975 păng hlŏh 500 kơ sơ̆p hla ar. ‘Măng ming pơ dă pơ gơ̆r kiơ̆ 2 tơ drong: Jơ hngâm pran đơ̆ng linh hăm kon pơ lei lơ̆m Tơ drong tơ blăh păng iung tơ jră pơ yan Phang 1975; Khul linh, kon pơ lei akŏm jơ hngâm tang găn đei jĭ COVID-19. 

Truh dăr lăng lơ̆m tơ drong pơ dă tơ ƀôh

Pơ ma lơ̆m jơ pơm lêh, Đại tá Thái Thành Đức, Phŏ Kơ dră jang Chinh trĭ Quân khu 7 pơ ma hơ dăh: tơ guăt 1 ƀơ̆r đon đơ̆ng linh hăm kon pơ lei ‘nŏh jĭ tơ drong tơm pơ jing đei tơ dỏng Tơ blăh jơ nei tih pơ yan Phang 1975. Ƀât đei jĭ COVID-19 ‘măng mă 4, khul linh păng kon pơ lei tơ̆ Quân khu 7 đei hlŏh 200 năr tơ lĕch kơ sư̆k tơ jră hăm jĭ. Hơ tŏk đon kơ chăng “tang găn jĭ nhen thoi tơ blăh hơ yăt”, vă jê̆ 10.000 ‘nu ƀô đô̆i tơm đơ̆ng Quân khu păng hlŏh 70.000 ‘nu dân quân mât bơ̆ jang tơ̆ tơ ring đei jĭ.

Dơ̆ng: Tơ blơ̆