VOV4.Bahnar - Gơ măng ‘năr 29/3, tơ̆ xăh Ka Đơn, apŭng Đơn Dương (Lâm Đồng) hlôi pơ gơ̆r lêh năr joh ayŏ, tơ plŏng kơ dâu tơ ring kon kông dêh char Lâm Đồng ‘măng mă 5 - 2022.

 Hăm hơ năn "Re jơ va groi kông", Năr joh ayŏ, tơ plŏng kơ dâu tơ ring kon kông dêh char Lâm Đồng ‘măng mă 5 - 2022 sơng đei 300 nghệ nhân truh đơ̆ng 12 apŭng, pơ lei tơm lơ̆m dêh char vang akŏm. Lơ̆m 2 năr, pơ gơ̆r lơ tơ drong jang vă tơ roi tơ băt găh vei răk tơ ƀăk mong kơ jă kăp gĭt tơ drong tôn chĭng chêng Tây nguyên; pơ jei băl jang kiơ̆ jơ nei Tơ drong tơ chơ̆t Hop akŏm bơ ngai tang măt lơ̆m teh đak ‘măng mă XIII kơ Đảng. 

 Mă loi ‘noh, lêh pơ gơ̆r blŭng a păng Gơ măng tơ goăt tơ goăl “ Re jơ va groi kông”, lơ tơ drong đei tơ ƀôh kiơ̆ pơm tông, tơ ƀôh dơ̆ng tơ drong iŏk yang ŭnh, yang chĭng chêng, soi kơ yang đak đơ̆ng bơ ngai Chu ru; pai sa tơ mam păng tôn chĭng chêng, hơ soang, ngôi hơ dai tơ pôl đơ̆ng dôm nghệ nhân bơ ngai Mạ, K'ho... ‘Ngoăih kơ ‘noh, năr lêh oei pơ gơ̆r dôm tơ drong pơ long găh tơ plŏng kơ dâu, dôm tơ drong ngôi pơ chơt kră sơ̆, tơ drong pơ long tôn chĭng chêng păng hơ ri brông....

Thuem: Tơ blơ̆