VOV4.Bahnar - Gơ măng ‘năr 19/4, Năr lêh joh ayŏ kơ dôm hơ drĕch kon kông dêh char Gia Lai ‘măng mă Mônh sơ năm 2022, hlôi đei pơ gơ̆r tơ̆ Cham să Đại Đoàn Kết, pơ lei tơm Plei Ku. Pơ gơ̆r lơ̆m 2 năr, đơ̆ng ‘năr 19/4 truh ‘năr 20/4, năr lêh joh ayŏ kơ dôm hơ drĕch kon kông dêh char Gia Lai ‘măng mă Mônh sơ năm 2022 đei tơ drong vang akŏm đơ̆ng vă jê̆ 800 ‘nu nghệ nhân, kang ƀô̆, bơ ngai jang kơ teh đak, dôm hơ drĕch hơ drŭng tơ̆ đĭ đăng 16 apŭng, thị xăh, pơ lei tơm kơ dêh char.

Pơ gơ̆r năr lêh Joh ayŏ kơ dôm hơ drĕch kon kông dêh char Gia Lai

Năr lêh ‘noh jĭ 1 lơ̆m dôm tơ drong jang tơ gop vei răk, tơ ƀăk mong dôm kơ jă kăp gĭt joh ayŏ joăt joe đơ̆ng kon pơ lei kơ dôm hơ drĕch kon kông dêh char Gia Lai; kơ kuh chơt hơ iă năr Joh ayŏ kơ dôm hơ drĕch hơ drŭng Việt Nam (19/4); tơ băt 47 sơ năm năr rơ ngei tơ ring pơ băh, rơ ngei teh đak păng 90 sơ năm năr pơ jing dêh char  Gia Lai. Năr lêh joh ayŏ kơ dôm hơ drĕch kon kông dêh char Gia Lai kŭm jing ‘măng vă kon pơ lei dôm hơ drĕch hơ drŭng lơ̆m dêh char tơ ƀơ̆p băl, pơ ma dơ nuh, tơ roi băl tơ drong hlôh vao păng vei kơ jăp tơ drong tơ goăt tơ goăl.

Thuem: Tơ blơ̆