VOV4.Bahnar - Pơ gê 10/2, tơ̆ Anih ‘măn răk-Anih mong hla ar dêh char Kon Tum, Khul chih hla ar tơ roi dêh char Kon Tum pơm lêh Pơ gơ̆r pơ dă Hla ar tơ roi Pơ yan puih mak Nhâm Dần dêh char Kon Tum sơ năm 2022 hăm hơ năn “Hơ iă kơ Đảng gơ̆h hơ gei, Hơ iă kơ pơ yan Puih mak Nhâm Dần”.

Bơ ngai đŏk truh hăm Năr Hla ar tơ roi pơ yan Puih mak Nhâm Dần dêh char Kon Tum sơ năm 2022

Pơ ma lơ̆m jơ pơm lêh, Phŏ Kơ dră vei lăng kon pơ lei dêh char Kon Tum Nguyễn Hữu Tháp akhan, Pơ dă hla ar chih tơ roi pơ yan Puih mak Nhâm Dần dêh char Kon Tum sơ năm 2022 jĭ năr pơ chơt đơ̆ng dôm bơ ngai chih hla ar tơ roi; tơ gŭm roi tơ băt dôm ƀai chih ăn kon pơ lei; Tơ iung jơ hngâm đon chih pơ chĕh gơ̆h hơ gei đơ̆ng khul bơ ngai chih hla ar tơ roi vă pơm lăp hăm tơ drong ‘mĕh vă roi đunh roi tŏk đơ̆ng bơ ngai đŏk, bơ ngai mơ̆ng, lăng. 

Roi tơ băt tơ mam xa đơ̆ng sơ̆ tơ̆ Năr Hla ar chih tơ roi pơ yan Puih mak Nhâm Dần dêh char Kon Tum sơ năm 2022

Tơ̆ năr pơ gơ̆r pơ dă Hla ar chih tơ roi pơ yan Puih mak Nhâm Dần dêh char Kon Tum sơ năm 2022 oei pơ gơ̆r lơ tơ drong jang nhen: Xa ngôi tơ mam xa kơ bơ ngai Bahnar, Jeh-Triêng; Pơ dă rup Tĕh păng kon bơ ngai Kon Tum; Roi tơ băt dôm tơ mam OCOP kơ dêh char hăm 5 kơ deng tơ mam,…

Pơ gơ̆r đơ̆ng ‘năr 10-13/2, Năr Hla ar chih tơ roi pơ yan Puih mak Nhâm Dần dêh char Kon Tum sơ năm 2022 ‘nŏh jĭ jơ năr vă khul bơ ngai chih hla ar tơ roi tơ̆ dôm anih chă tơ ƀâp, pơ ma nuh, hŏk iŏk tơ drong kăl đơ̆ng băl, đơ̆ng nŏh đei dơ̆ng đon hlôh vao, chih ƀai gơ̆h hơ gei. ‘Nâu kŭm jing jơ năr vă dêh char Kon Tum roi tơ băt dôm tơ drong juăt ‘lơ̆ng hơ iă đơ̆ng sơ̆ truh hăm kon pơ lei, tơ moi chă tơ mang lăng lơ̆m păng ‘ngoăih kơ dêh char.

Dơ̆ng: Tơ blơ̆