VOV4.Bahnar - Pơ gê ‘năr 26/4, tơ̆ Hơ nih pơ tâp hơ kâu jăn Kŏng an dêh char Kon Tum pơ gơ̆r lêh pơ long teh tenis hơ gei drŏ nglo - drŏ kăn kơ teh đak Cúp sâm Ngọc Linh Kon Tum K5 sơ năm 2022. ‘Nâu jĭ ‘măng mă blŭng dêh char Kon Tum păng kŭm jing dêh char mă blŭng lơ̆m tơ ring Tây Nguyên iŏk pơ gơ̆r pơ long âu. Pơ gơ̆r lơ̆m 7 năr, đơ̆ng 26/4 truh ‘năr 2/5, pơ long teh tenis pran hloh drŏ nglo - drŏ kăn kơ teh đak Cúp sâm Ngọc Linh Kon Tum K5 sơ năm 2022 đei 140 ‘nu bơ ngai teh pran hloh kơ Việt Nam păng dôm bơ ngai teh Việt kiều vang pơ long.

Rơ̆ih cham pơ long mă blŭng đơ̆ng bơ ngai teh tenis Nguyễn Tâm Đăng khŭl linh - Trần Quang khŭl Kon Tum

Đei 5 tơ drong pơ long pơ jei, ‘noh: teh hơ drô̆ drŏ nglo,  teh hơ drô̆ drŏ kăn, teh hơ dai 2 ‘nu drŏ nglo, 2 ‘nu drŏ kăn păng teh hơ dai 2 ‘nu drŏ nglo - drŏ kăn. Mĭnh ‘nu teh tenis gơh pơ long tôch ai 2 tơ drong păng dôm tơ drong pơ long hơ dai. Kơ dră Khŭl pơ gơ̆r pơ long tơ băt, pơ long đei pơ gơ̆r vă pơm tơ drong hiôk ăn dôm bơ ngai pơ long hơ tŏk loi dơ̆ng pơ jei băl pran hloh păng hơ met ăn pơ long Seagame 31.

Thuem: Tơ blơ̆