VOV4.Bahnar - Pơ gê brei (14/6), tơ̆ cham đă ƀŏng lŏng dêh char Kon Tum tơ̆ pơ lei tơm Kon Tum hlôi pơ gơ̆r blŭng a pơ long tơ plŏng kơ dâu dêh char Kon Tum ‘măng mă VII sơ năm 2022. Pơ gơ̆r lơ̆m 7 năr, đơ̆ng dang ei truh đĭ ‘năr 20/6, pơ long tơ plŏng kơ dâu dêh char Kon Tum ‘măng mă VII sơ năm 2022 đei 30 khŭl hăm 2.600 ‘nu kang ƀô̆, bơ ngai pơ hrăm păng bơ ngai vang pơ long vang akŏm. Tơ̆ pơ long âu dôm bơ ngai vang pơ long pơ jei băl tơ̆ 18 môn pơ long pơ jei iŏk 136 mê đai.

Tôi rup ƀok Hồ tơ̆ lêh pơ gơ̆r blŭng a pơ long tơ plŏng kơ dâu dêh char Kon Tum ‘măng mă VII sơ năm 2022

Hơ drol kơ pơ gơ̆r blŭng a pơ long hlôi đei 10 môn đei pơ gơ̆r pơ long hơ drol, ‘noh đei: teh ƀĕng ƀŏng, teh sŏk iĕr, cờ vua, cờ tướng, glơi, kơ dâu, đă ƀŏng lŏng drŏ nglo, ƀyoh păng yoga.  Ƀok Nguyễn Xuân Truyền, Phŏ Kơ dră Anih vei lăng găh joh ayŏ, tơ plŏng kơ dâu păng tơ mang lăng, Phŏ kơ dră Khŭl pơ gơ̆r pơ long tơ plŏng kơ dâu dêh char Kon Tum ‘măng mă VII sơ năm 2022 tơ băt, pơ têng hăm ‘măng pơ gơ̆r hơ drol, pơ long ‘măng âu đei tơ drong tŏk pơ đĭ găh kơ sô̆ môn pơ long păng kơ sô̆ bơ ngai vang pơ long.

Thuem: Tơ blơ̆