VOV4.Bahnar - Gơ măng (11/1), tơ̆ plt Buôn Ma Thuột, Anih vei lăng tơ plŏng kơ dâu, Khul vei lăng tĕh ƀŏng ƀan Việt Nam jang hơ doi hăm Dơ nŏ anih vei lăng kon pơ lei dêh char Dak Lak pơ gơ̆r thi ăn dôm CLB tĕh ƀŏng ƀan lơ̆m tĕh đak sơ năm 2021. Tơ drong thi pơ gơ̆r đơ̆ng gơ măng (11/1/2022) truh đĭ ‘năr (15/1/2022).

Pơ gơ̆r thi tĕh ƀŏng ƀan rơ gei

Tơ drong thi sơ năm ‘nâu akŏm đei 152 ‘nu bơ ngai thi đơ̆ng 22 Khul tĕh ƀŏng ƀan tơ̆ 10 dêh char, plt đei tơ drong tĕh ƀŏng ƀan pran rơ gei nhen: Hà Nội, plt Hồ Chính Minh, Đà Nẵng, dôm dêh char Hải Dương, Hải Phòng, Khánh Hòa, Lâm Đồng, Nghệ An, Bình Dương păng dêh char Dak Lak. Dôm bơ ngai thi pơ jei băl iŏk 14 grŭp mê đai găh dôm tơ drong nhen: Tĕh hơ dai drŏ nglo, tĕh hơ dai drŏ kăn, tĕh hơ dai 2 ‘nu drŏ nglo, 2 ‘nu drŏ kăn, tĕh hơ drô̆ ăn drŏ kăn păng tĕh hơ drô̆ ăn drô̆ nglo.

Kiơ̆ Anih pơ gơ̆r, ‘nâu jĭ tơ drong thi đei lơ̆m tơ drong pơ gơ̆r thi tĕh ƀŏng ƀan kơ tĕh đak, kiơ̆ đơ̆ng âu Khul vei lăng tĕh ƀŏng ƀan Việt Nam chă rơih dôm bơ ngai tĕh rơ gei hlŏh vă pơ tho pơ hrăm, chih tơ mât lơ̆m khul tĕh ƀŏng ƀan kơ tĕh đak.

Dơ̆ng: Tơ blơ̆