VOV4.Bahnar - ‘Năr 19/5, tơ̆ plt Buôn Ma Thuột, Khul chih pơ chĕh ƀai hơ ri Việt Nam jang hơ doi hăm dêh char Dak Lak pơ gơ̆r tơ drong jŏh hơ ri lơ̆m tĕh đak đơt 1 sơ năm 2022 hăm tơ drong vang akŏm đơ̆ng khul jŏh hơ ri kơ 20 dêh char, plt lơ̆m tĕh đak.

Tơ drong jŏh hơ ri hơ xoang lơ̆m tĕh đak đơt 1 sơ năm 2022 đei pơ gơ̆r tơ̆ Dak Lak

Đei pơ gơ̆r truh đĭ năr ‘nâu, ‘năr 20, tơ drong jŏh hơ ri lơ̆m tĕh đak ‘măng mă âu đei 52 ƀai hơ ri, rĕh đơn, tĕh hơ gơ̆r... Ƀai hơ ri mă lơ ‘nŏh pôk pơ ư Đảng, Ƀok Hô, Tĕh đak păng pôk pơ ư đak dơ sĭ, achon kông tơ̆ đak dơ sĭ Việt Nam; tơ drong jơ nei, tơ drong jang pơ jing tơ ring tơ rang ‘nao tơ̆ tĕh đak bơ̆n hrei ‘nâu. Mă loi đei lơ ƀai hơ ri đei chih pơ chĕh kiơ̆ boa hơ ri tơ̆ dôm tơ ring, lơ̆m nŏh đei boa hơ ri tơ̆ Tây Nguyên.

Tơ drong jŏh hơ ri âu jing năr vă dôm bơ ngai chih pơ chĕh păng kon pơ lei ‘mĕh mơ̆ng ƀai hơ ri pôk pơ ư, roi tơ băt ƀai hơ ri kơ dih, hơ nơ̆ng pơ lung jơ hngâm đon chih pơ chĕh, jŏh hơ ri hơ xoang păng pơ tho pơ hrăm; Kŭm jing jơ năr tơ ƀâp, pơ ma nuh găh tơ drong hơ ri hơ xoang đơ̆ng dôm bơ ngai chih pơ chĕh, dôm bơ ngai hơ ri hơ xoang pơm lăp hăm tơ drong ‘mĕh mơ̆ng, lăng roi đunh roi tŏk đơ̆ng kon pơ lei.

Dơ̆ng: Tơ blơ̆