VOV4.Bahnar - Kơ sơ̆ ‘năr (1/7), tơ̆ cham đă ƀŏng lŏng dêh char Kon Tum pơ gơ̆r Lêh pơ tơm blŭng pơ long kơ dâu khŭl sơ năm mơ lôh kơ teh đak sơ năm 2022. Tơ drong pơ long yua đơ̆ng Jơ nŭm vei lăng tơ drong kơ dâu Việt Nam jang hơ dai hăm dêh char Kon Tum pơ gơ̆r. Pơ gơ̆r lơ̆m 5 năr, đơ̆ng ‘năr 1 truh 5/7 tơ̆ cham đă ƀŏng lŏng dêh char Kon Tum, pơ long kơ dâu khŭl sơ năm mơ lôh kơ teh đak sơ năm 2022 đei 670 ‘nu bơ ngai kơ dâu đơ̆ng 61 dêh char, pơ lei tơm păng anih jang lơ̆m teh đak vang pơ long.

Dôm bơ ngai kơ dâu đei sơ năm đơ̆ng 12 - 17 vang pơ jei tơ̆ 136 tơ drong tơ gar 136 mê đai. ‘Moi kiơ̆ tơ drong pơ long âu vă chă ƀôh, rơ̆ih iŏk păng pơ hrăm ming dôm bơ ngai kơ dâu mơ lôh pran tơ mơ̆t lơ̆m khŭl pơ long ăn dôm pơ long kơ teh đak păng apŭng plĕnh teh.

Thuem: Tơ blơ̆