VOV4.Bahnar - Pơ gê ‘năr 9/6, tơ̆ Hà Nội pơ gơ̆r lêh pơ tôch, pơ jao tơ mam hơ lăh tơ drong pơ long chih “ dôm bơ ngai arih sa ‘lơ̆ng hơ iă” ‘măng mă 13 (sơ năm 2021 - 2022) yua đơ̆ng Hla ar chih tơ roi Khŭl linh kon pơ lei; Anih ạng chih kơ tơ̆ng ang - in tơ lĕch ( Anih tơ roi tơ băt Trung ương) jang hơ dai pơ gơ̆r. Khŭl pơ gơ̆r hlôi rơ̆ih iŏk 19 ƀai chih hơ gei hloh vă pơ jao tơ mam hơ păh. Tơ drong pơ long đei tơ lĕch jang đơ̆ng khei 6 sơ năm 2021 truh đĭ khei 4 sơ năm 2022. Khŭl pơ gơ̆r hlôi iŏk đei hloh 200 ƀai pơ long tơ̆ dôm kơ loăi chih kơ tơ̆ng ang.

Hla ar chih tơ roi Khŭl linh kon pơ lei hlôi rơ̆ih iŏk chih tăh lơ̆m dôm hla ar tơ roi kơ hla ar chih kơ tơ̆ng ang 146 ƀai chih hơ gei, lơ̆m noh Khŭl pơ gơ̆r hlôi rơ̆ih iŏk đei 19 ƀai chih hơ gei hloh vă pơ jao tơ mam hơ păh ‘noh: 2 jơ nei mă mônh, 3 jơ nei mă 2, 4 jơ nei 3, 10 jơ nei pơ chhơp jơ hngơ̆m. Phŏ Kơ dră vei lăng Anih jang chính trị Khŭl linh kon pơ lei Việt Nam, Kơ dră Khŭl pơ gơ̆r tơ drong pơ long Trịnh Văn Quyết tơ băt, dôm ƀai chih kŭm hlôi chih tơ roi lơ tơ drong hlôh vao hơ iă, ƀai hŏk kăp gĭt lơ̆m bơ̆ jang, hŏk pơ hrăm, pơm kiơ̆ jơ hngơ̆m đon ‘lơ̆ng Hồ Chí Minh. 

Thuem: Tơ blơ̆