‘Nâu jing tơdrong jang lơ̆m Năr akŏm joh ayŏ hơdrung kon kông dêh char Đăk Lăk. Kiơ̆ khôi kơ bơngai Êđê et iŏk ŏng đei pơgơ̆r ah tôch khei năr pơdrơ̆ng mă bơngai mai oei gah hnam dră nglo, păng unh hnam drăkăn hlôi ‘nhăk tôm tơmam drăm kăl mă gah unh hnam dră nglo pơkăl ah 2 pah unh hnam et pơsĭt păng pơkăp adrol kơ noh.

Kơplah âu, 2 pah unh hnam hlôi drơ̆ng nơ̆r lê̆ bre klo hơkăn mơlôh gơh vih oei gah unh hnam mĕ ƀă hơkăn. Bre klo hơkăn mơlôh gô năm truh hnam mĕ ƀă hơkăn vă pơgơ̆r dôm tơdrong tơchơ̆t kiơ̆ khôi. Lơ̆m tơdrong vih vơ̆t, khul năm sơng iŏk ŏng gô ƀơm minh ƀar tơdrong tơhlăk tơnap tap nhen ƀơm ‘nhŏng oh gah unh hnam drăkăn pơhle, găn trong, pơm tơnap tap. Khôi sơng iŏk pơtôch ah 2 pah unh hnam drơ̆ng nơ̆r ăn tơbre klo hơkăn mơlôh vih gah hnam mĕ ƀă hơkăn, iŏk đei lơ nơ̆r thơ thâu đơ̆ng ‘nhŏng oh kơtum kơtŏng. Gah hnam drăkăn tơkang ge tơdrô păng hơvơn rim bơngai atŭm et xa chơt hơ-iă ‘nă hal.