Pơgơ̆r đơ̆ng dang ei truh đĭ năr 24/11 âu kơnh, pơdăh đei 86 tak phẩm mih thuơ̆t đơ̆ng dôm bơngai pơjing lơ̆m păng 'nguaih kơ dêh char Đăk Lăk.

Dôm tak phẩm đei tơbang hăm lơ tơmam phara băl nhen chrăh 'long, phâ̆n tiên, um pik jâu, um che lŭa, in mica, xơng mai, tơbang tơdrong 'lơ̆ng lăp lơ̆m dôm tơdrong erih tơpôl, tơdrong guăng 'lơ̆ng kơ cham char păng kon bơngai, đon băt kơ pơlei pơla teh đak, khôi juăt, um ai joh ayŏ kăp gĭt kơ dôm hơdrung bơngai kon kông tŏk bŏk oei erih jang xa tơ̆ Tây Nguyên. Pơdăh Mih thuơ̆t dêh char Đăk Lăk 'măng mă âu đei hơtŏk kiơ̆ pơkăp pơdăh Pơyan hla ruih groi kông đơ̆ng Kâu lak ƀô̆ Mih thuơ̆t, Anih joh ayŏ dêh char Đăk Lăk. 'Nâu jing tơdrong akŏm joh ayŏ kăp gĭt, tơgop tih tên lơ̆m tơdrong tơroi tơbăt um ai pơlei pơla păng kon bơngai Đăk Lăk "gơh rơgei – oei xa 'lơ̆ng dih băl – băt 'mêm kơ tơmoi" truh hăm tơmoi lơ̆m păng 'nguaih kơ teh đak.