Hăm hơnăn "Kơsơ̆p hla bơar: Jơhngơ̆m đon hlôh vao-Tơplih ‘nao-Tơchăr hơgei”, Năr kơsơ̆p hla bơar păng tơdrong joăt đŏk hla bơar sơnăm 2023 lơ̆m dêh char Đak Lăk đei pơgơ̆r đơ̆ng năr 15/4 truh năr 1/5 kơnh hăm lơ tơdrong pơgơ̆r hơ iă nhen: pơdă kơsơ̆p hla bơar; pơma dơnuh, tơƀôh tơbăt kơsơ̆p hla bơar; vang tơra tơgop kơsơ̆p hla bơar păng tơmam drăm đŏk pôk ăn đe hơ iŏh dơnuh; pôk ăn kơsơ̆p hla bơar păng hơtuh mong kơsơ̆p hla bơar ăn rim hnam trương, hơnih mong răk kơsơ̆p hla bơar rim tơring hơtăih yăih; pơgơ̆r Năr lêh kơsơ̆p hla bơar, năr lêh đŏk hla bơar tơ̆ rim tơring… đơ̆ng noh tơƀôh tơbăt găh groi teh, kon bơngai Đak Lăk; tơƀôh tơbăt tơdrong đei, tơdrong jơnei păng chăl sơnăm gĭt kăl oei sa joh ayŏ Tây Nguyên, pôk pơ ư atŏk tơ iung tơdrong joăt đŏk hla bơar. Atŭm hăm ‘nŏh oei đei rim tơdrong pơgơ̆r kiơ̆ rok nhen pơdă tơƀôh um rup, tơmam drăm STEM, hơ iŏh chhơ̆ rup; pơlong dih băl kơ vua; chă tanh pơrŏ tơmam drăm ‘lơ̆ng liĕm.