Vang năm pơlong đei 500 ‘nu bơngai tôn chĭng chêng hơsoang kơ 15 dêh char, thĭ xăh păng pơlei tơm lơ̆m dêh char. Lơ̆m 3 gơmăng pơlong, rim hơnĭh hlôi pơlong tôn chĭng chêng, jŏh hơri, pơgơ̆r kiơ̆ tơdrong kơ̆m kang kơnang giĕng joăt joe kơ rim hơdrung nhen Ê Đê, Mnông, Jrai.

‘Nau jơ ‘năr vă rim bơngai tôn chĭng chêng, jŏh hơsoang kon pơlei pơla đei rơvơn tơƀơ̆p, pơma dơnŭh dĭh băl hăm tơdrong pơgơ̆r tôn chĭng chêng, pơrô̆ tơbăt, tơroi tơbăt tơdrong tôn chĭng chêng Tây Nguyên. Adoi atŏk kơtang jơhngơ̆m đon kơchăng, hơnăp jang, jơhngơ̆m đon hưch hanh hơmanh bơnê kơ dôm bơngai bơ̆ jang vei răk tơƀăk mong păng atok tơ iung tơdrong oei sa joăt joe ‘lơ̆ng rŏ kơ hơdrĕch hơdrung.