Đei pơgơ̆r lơ̆m 2 năr, năr 14 păng 15/4, năr lêh đei vang năm đơ̆ng vă jê̆ 800 ‘nu nghê̆ nhân, kang ƀô̆,rim hơdrung oei lơ̆m 17 apŭng, thĭ xah, pơlei tơm kơ dêh char. Vang năm lơ̆m năr lêh, rim khul nghê̆ nhân păng rim nghê̆ nhân gô pơgơ̆r pơm dơ̆ng tơdrong oei sa joh ayŏ joăt joe sơ̆ ki nhen: Tôn chĭng chêng, joh hơri, tôn reh tĭng nĭng chĭng klơk, jrăh mul meo, tanh jĭt, dui brai vai tanh khăn… 

Năr lêh Joh ayŏ kơdŏ soang rim hơdrung dêh char Gia lai jing jơ ‘năr vă kon pơlei rim hơdrung lơ jơhnơr lơ̆m dêh char chă tơƀơp dih băl, pơma dơnuh dih băl păng tơgoăt hloh dơ̆ng jơhngơ̆m đon tơgoăt tơgoăl dih băl kơ rim khul nghê̆ nhân. Kơdrơ̆m tơmoi hlôi vang năm lăng pơm lêh păng vang chă hơsoang tơdrong hơsoang Tây Nguyên.