Bơngai Kơ Tu lăng ‘nau ‘noh pơgơ̆r Pa’đăh ‘noh jĭ mĭnh tơdrong pơgơ̆r et sa hmach bơnê đơ̆ng bơngai ŏng hăm tơnei păng ‘nhŏng oh păh hơkăn. ‘Nau đei lăng jing “ tơdrong pơkong ‘măng mă 2”, hmă hmă đei pơgơ̆r đơ̆ng rŏng minh sơnăm klo hơkăn jur kơdih. Mưh tơdrong hơrih sa kơ klo hơkăn hlôi sơđơ̆ng, rim bơngai ŏng hơdrung Kơ Tu tơchĕng truh tơdrong lăng ba tơnei, bơnê tơdrong rong ‘me đơ̆ng tơnei hăm hơkăn bơ̆n. Kơ yuơ mưh brŏk oei tơ̆ hnam klo, bơngai drŏ kăn ưh kơ đei khei ‘năr vei lăng năng tông, jang sa ăn mĕ ƀă, tơplih lơ̆m noh ‘măn jơ ‘năr vei lăng năng tông lơ hloh dơ̆ng ăn ŭnh hnam klo.

Pơgơ̆r Et sa bơnê tơnei kơ hơdrung Kơ Tu pơgơ̆r tôch kơ tih. Gô mơ̆ng kiơ̆ tơdrong đei ƀôh lơ liơ kơna bơngai ŏng chă răt mŭk drăm, pơgơ̆r tih iĕ lơ liơ. Kră pơlei ƀok Bríu Pố, oei tơ̆ tơring Lăng, apŭng Tây Giang, dêh char Quảng Nam, tơbăt: "Bơngai drŏ nglo hlôi iŏk hơkăn mưh đei 1 ‘nu hơ ‘lơ̆p ‘nŏh pơgơ̆r Et sa bơnê kơ tơnei hlôi rong ‘me hơkăn bơ̆n gơ̆h găt, jang sa hơgei. Pôk bơnê kơ tơnei hăm mĭnh tŏ kơpô păng pơgơ̆r tôn chĭng chêng prăt măng hloi. Păh ŭnh hnam tơnei hơmet ăn ‘nhĕm ‘nhot atŭm hăm ŭnh hnam bơngai ŏng et sa tôn chĭng chêng 3 năr hơnơ̆ng. Lơ̆m pơgơ̆r Et sa bơnê ‘nŏh jei soi tơbeh kơ yang, hơvơ̆h hơvơi hơpơi yang lăng tông nông yua ƀar ŭnh hnam pô̆ băn tơƀơ̆p pŭn ai, kon pơlei jang sa iŏk đei kơjăp, pran jăng grăng akau, ưh kơ đei jĭ jăn au to." 

Hmă hmă, năr blŭng ‘nŏh tơdrong soi tơbĕh kơ yang lăp hơdrô̆ ŭnh hnam pơgơ̆r. Năr đơ̆ng rŏng ‘noh mă chă krao hơvơn kơtum kơtŏng ‘nhŏng oh tơjê̆ hơtăih vang et sa. Păng tơdăh đei ƀôh ‘nŏh pơgơ̆r chă hơsoang tung tung, da dá joăt joe kơ bơngai Kơ Tu. Lơ̆m pơgơ̆r Et sa Pa’đăh, tơdăh lăp ket nhŭng lei chă hơvơn kơtum kơtŏng ŭnh hnam hơkăn păng et sa lăp mĭnh măng miưnh năr. Tơdăh koh kơpô dăh mă rơmo lei mĕ ƀă hơkăn chă hơvơn kon pơlei vang năm et sa pơgơ̆r dôm năr hloi. Mŏ Bhling Thị Trơu, oei tơ̆ dêh char Quảng Nam, tơbăt:"Păh ŏng hơla ăn tơnei mĭnh tŏ kơpô, rơmo, nhŭng, iĕr, bip, chĭng chêng, ge, hơnam, tơmŏng ... dăh mă mŭk drăm yă kiơ kăp gĭt mă sư đei chă hơla ăn. Đe hăp hơla ăn kơ yuơ iŏk đei hơkăn, chă hơla ăn kơ yuơ tơnei vei lăng năng tông, rong ‘me kon hơ ‘lơ̆p. Tơdrong tơm chă hơla ăn tơnei ‘noh tơ iung pơjing ŭnh hnam hơrih sa tơƀĕ dang dŏng tơƀŏng dang dan."

Tơdrong gĭt kăl lơ̆m pơgơ̆r Et sa pă’đăh ‘noh ‘ngoăih chă et sa, oei đei tơdrong pơgơ̆r chă hơla ‘nhĕm đơ̆ng ŭnh hnam drŏ nglo ăn kơ ŭnh hnam drŏ kăn, tơbăt jơhngơ̆m đon pơvei dih băl kơjăp, yom dih băl kơtang đơ̆ng ŭnh hnam drŏ nglo ‘măn ăn ŭnh hnam drŏ kăn. Dôm tơnăt ‘nhĕm ‘lơ̆ng đơ̆ng bơngai ŏng rơ̆ih, hơtŭm hăm tơnôr hling ƀĕnh hơvơ̆h ŭnh hnam chă chro ăn rim bơngai ŭnh hnam drŏ kăn. Mưh chă huch đĭ tơnôr, sa đĭ ‘nhĕm, bơngai Kơ Tu lui akhan tơdrong pơvei dih băl ƀar păh ŭnh hnam ‘lơ̆ng hơ iă hloh dơ̆ng, pơvei dih băl tơklep hloh dơ̆ng. Ƀok Abing Lâm oei tơ̆ apŭng Tây Giang, dêh char Quảng Nam, tơbăt:"Đe sư chă krao hơvơn kơtum kơtŏng ‘nhŏng oh, bôl boăl, pơlei pơla tơjê̆ hơtăih vang et sa. 300 truh 400 ‘nu bơngai ƀuh kơpô rơmo, nhŭng vang et sa. Bơngai Kơtu chă hơla ăn tơnei bơ̆n chĭng chêng, pơnhan, kơpô, rơmo, iĕrt, bip, tơdrô, hu măih, kon jên..."

Pơgơ̆r Et pôk bơnê kơ tơnei hơdrung Kơ Tu ‘noh mĭnh tơdrong joăt đơ̆ng sơ̆ ki, tơƀôh hơdăh jơhngơm đon ‘lơ̆ng. Tơdrong joăt au vă kơ mĕ ƀă hơrih sot, hiôk jơnap hơtŭm hăm kôn mon kon sau adoi nhen hiôk chơt tơ̆ hơnăp pơlei pơla. ‘Nau jei jĭ jơ ‘năr vă ƀar păh pô̆ băn đei jơ ‘năr chă tơƀơ̆p dih băl, tơgoăt dih băl kơjăp hloh dơ̆ng.